وزیر خزانہ محمد اورنگزیب سے ایم ڈی ورلڈ بینک کی ملاقات، اہم شعبوں میں تعاون بڑھانے پر تبادلہ خیال

وفاقی وزیر خزانہ سینیٹر محمد اورنگزیب  نے سعودی عرب میں جاری سالانہ “العلاء کانفرنس برائے ابھرتی ہوئی معیشتیں” کے موقع پر ورلڈ بینک گروپ کی منیجنگ ڈائریکٹر، مس اینا بیئرڈے، سے ملاقات کی۔ ملاقات میں گزشتہ ہفتے ورلڈ بینک کے صدر کے پاکستان کے دورے کے بعد ملک کے پارٹنرشپ فریم ورک  کے تحت کیے جانے والے کاموں کی پیش رفت کا جائزہ لیا گیا اور ترقیاتی تعاون کو مزید مضبوط بنانے کے لیے آگے کے لائحہ عمل پر تبادلہ خیال کیا گیا۔

 ملاقات  کے دوران توانائی، تعلیم، صحت، موسمیاتی لچک، قرضے برائے ترقی کے تبادلے، مالیاتی اصلاحات اور بنیادی ڈھانچے کی ترقی جیسے اہم شعبوں پر بات ہوئی۔ اس دوران اس بات پر زور دیا گیا کہ ترقیاتی منصوبوں کو زیادہ مؤثر بنانے کے لیے واضح کارکردگی کے ٹریکرز متعارف کرائے جائیں اور مضبوط نفاذی میکانزم یقینی بنایا جائے تاکہ وعدے عملی نتائج میں تبدیل ہو سکیں۔

مس اینا بیئرڈے نے پاکستان کے دس سالہ ترقیاتی پروگرام کے لیے ورلڈ بینک گروپ کی 20 ارب امریکی ڈالر کی مضبوط حمایت کا اعادہ کیا اور کہا کہ بینک پاکستان کے اصلاحی اور ترقیاتی ایجنڈے کے لیے مسلسل تعاون جاری رکھے گا۔ انہوں نے اس بات پر بھی زور دیا کہ ترقیاتی پروگرام کے زیادہ سے زیادہ مثبت اثرات کے لیے تسلسل اور مؤثر عمل درآمد انتہائی ضروری ہے۔

یہ بھی پڑھیں :وزیر خزانہ محمد اورنگزیب نے ملکی معیشت کے 2 بڑے مسائل کی نشاندہی کردی

سینیٹر محمد اورنگزیب نے حکومت پاکستان کی ورلڈ بینک گروپ کے ساتھ قریبی تعاون کی یقین دہانی کرائی اور متعلقہ وفاقی وزارتوں کے ذریعے مکمل تعاون کی یقین دہانی کروائی۔ انہوں نے صوبائی حکومتوں کے کردار اور تعاون پر بھی زور دیا تاکہ بہتر رابطہ کاری، بروقت عمل درآمد اور قابلِ ماپ نتائج حاصل کیے جا سکیں۔

العلاء کانفرنس برائے ابھرتی ہوئی معیشتیں  جو 2025 میں شروع ہوئی، مالیاتی وزرا، مرکزی بینک کے گورنرز، سینئر پالیسی ساز، بین الاقوامی مالیاتی اداروں کے سربراہان اور دنیا کے ممتاز ماہرین کو جمع کرتی ہے تاکہ ابھرتی ہوئی معیشتوں کے اہم اقتصادی چیلنجز اور مواقع پر تبادلہ خیال کیا جا سکے۔