سپریم کورٹ کا بڑا حکم جاری، شہباز شریف کے عمران خان کے خلاف ہتکِ عزت مقدمے نے نیا موڑ لے لیا

سپریم کورٹ آف پاکستان نے ہتکِ عزت کیس میں سابق وزیر اعظم عمران خان کی جانب سے موجودہ وزیر اعظم شہباز شریف کے خلاف دائر درخواست پر اہم پیش رفت کرتے ہوئے تین رکنی بنچ تشکیل دینے کا حکم دے دیا ہے۔ اس حوالے سے ابتدائی سماعت جسٹس شاہد بلال حسن نے کی، جس میں کیس کی موجودہ قانونی حیثیت پر تفصیلی غور کیا گیا۔

یہ بھی پڑھیں:شہباز شریف سے سہیل آفریدی کی اہم ملاقات، وزیراعظم نے صوبائی حکومت سے کیا کہا؟، تفصیل سامنے آگئی

سماعت کے دوران جسٹس شاہد بلال حسن نے استفسار کیا کہ اس کیس کی موجودہ پوزیشن کیا ہے، جس پر عمران خان کے وکیل نے عدالت کو آگاہ کیا کہ ہتکِ عزت کا یہ مقدمہ اس وقت لاہور ہائیکورٹ میں زیرِ سماعت ہے اور وہاں اس پر کارروائی جاری ہے۔ وکیل نے مؤقف اختیار کیا کہ اس معاملے میں سپریم کورٹ کی مداخلت بعض آئینی اور قانونی نکات کی وضاحت کے لیے ضروری ہے۔

عدالت نے دونوں فریقین کے دلائل اور مؤقف سننے کے بعد کیس کی مزید سماعت مؤخر کرتے ہوئے کارروائی دو ہفتوں کے لیے ملتوی کر دی۔ عدالت نے واضح کیا کہ آئندہ سماعت تشکیل دیے گئے تین رکنی بنچ کے روبرو ہو گی، جہاں کیس کو ازسرِ نو سنا جائے گا اور تمام قانونی پہلوؤں کا تفصیلی جائزہ لیا جائے گا۔

مزید پڑھیں:کرکٹ بورڈ پربھارتی قبضہ، بھارت سے بے دخل یو اے ای کرکٹر محمد زوہیب کی ویڈیو وائرل، ہوشربا انکشافات

عدالتی حلقوں کے مطابق تین رکنی بنچ کی تشکیل اس بات کی عکاس ہے کہ معاملہ قانونی اور سیاسی دونوں حوالوں سے غیر معمولی اہمیت کا حامل ہے۔ ماہرین قانون کا کہنا ہے کہ سپریم کورٹ میں اس کیس کی سماعت نہ صرف ہتکِ عزت کے قوانین کی تشریح پر اثر انداز ہو سکتی ہے بلکہ اعلیٰ سیاسی شخصیات کے مابین قانونی تنازعات کے مستقبل کا رخ بھی متعین کر سکتی ہے۔

یہ کیس ایک ایسے وقت میں زیرِ بحث آیا ہے جب ملکی سیاست پہلے ہی شدید کشیدگی کا شکار ہے اور اعلیٰ عدلیہ میں زیرِ سماعت سیاسی نوعیت کے مقدمات کو عوامی اور سیاسی حلقوں میں غیر معمولی توجہ حاصل ہے۔