لاہور کے سفاری پارک میں حالیہ دنوں کے دوران جانوروں کی ہلاکتوں نے تشویش کی لہر دوڑا دی ہے، جہاں چند ہی دنوں میں نو شیر ہلاک ہو گئے جبکہ بیرونِ ملک سے لائے گئے دو زرافے بھی جانبر نہ ہو سکے۔ واقعے کے بعد محکمہ وائلڈ لائف کی جانب سے صورتحال کی وضاحت اور مستقبل میں ایسے واقعات سے بچاؤ کے لیے اقدامات کا اعلان کیا گیا ہے۔
ایڈیشنل چیف وائلڈ لائف کے مطابق سفاری پارک میں ہلاک ہونے والے شیر پہلے سے مختلف بیماریوں میں مبتلا تھے۔ انہوں نے بتایا کہ یہ شیر محکمہ وائلڈ لائف کی تحویل میں تھے اور کچھ جانوروں میں جسمانی معذوری اور کمزوری بھی پائی گئی تھی، جس کے باعث وہ صحت کے مسائل کا شکار رہے۔ ان کا کہنا تھا کہ جانوروں کی حالت پر مسلسل نظر رکھی جا رہی تھی تاہم بیماری کی شدت کے باعث انہیں بچایا نہ جا سکا۔
انہوں نے مزید بتایا کہ بیرون ممالک سے درآمد کیے گئے دو زرافے بھی بیماری کے باعث ہلاک ہوئے، جس پر انتظامیہ نے فوری طور پر احتیاطی اقدامات سخت کر دیے ہیں۔ ان کے مطابق باقی ماندہ زرافوں اور دیگر جانوروں کی خصوصی دیکھ بھال کی جا رہی ہے تاکہ مزید کسی نقصان سے بچا جا سکے۔
محکمہ وائلڈ لائف کے ایڈیشنل چیف کا کہنا تھا کہ جانوروں کے تحفظ، صحت اور دیکھ بھال کے نظام کو مزید مؤثر بنانے کے لیے ایک خصوصی کمیٹی تشکیل دی جا رہی ہے۔ یہ کمیٹی سفاری پارک میں موجود جانوروں کی مجموعی صورتحال کا جائزہ لے گی اور مستقبل میں بیماریوں کی روک تھام، بہتر طبی سہولیات اور انتظامی خامیوں کی نشاندہی کرے گی۔
By 
