ہار کے بعد پاکستان ٹیم کا رن ریٹ گر گیا،قومی ٹیم اگلے مرحلے میں کیسے پہنچ سکتی؟

آئی سی سی  ٹی 20 ورلڈ کپ 2026 میں بھارت کے خلاف 61 رنز کی شکست نے پاکستان کی سپر 8 مرحلے تک رسائی کو مشکل بنا دیا ہے۔ اس اہم میچ میں ناکامی کے بعد پاکستان کے نیٹ رن ریٹ کو شدید دھچکا پہنچا ہے، جس کے باعث ٹیم کی پوزیشن پوائنٹس ٹیبل پر کمزور ہو گئی ہے۔

بھارت کے خلاف شکست سے قبل پاکستان کا نیٹ رن ریٹ مثبت 0.932 تھا، تاہم اس بڑی شکست کے بعد یہ کم ہو کر منفی 0.403 ہو گیا ہے۔ نیٹ رن ریٹ میں اس نمایاں کمی کے باعث پاکستان پوائنٹس ٹیبل پر امریکا سے بھی نیچے آ گیا ہے، جس سے سپر 8 مرحلے تک رسائی کے امکانات مزید پیچیدہ ہو گئے ہیں۔

یہ بھی پڑھیں :پاکستانی بیٹرز کا فلاپ شو،بھارت نے پاکستان کو بڑے مارجن سے ہرا دیا

اس وقت امریکا نے چار میچز میں دو کامیابیاں حاصل کر کے چار پوائنٹس حاصل کیے ہوئے ہیں اور اس کا نیٹ رن ریٹ 0.788 ہے، جو پاکستان سے بہتر پوزیشن کو ظاہر کرتا ہے۔ دوسری جانب بھارت اس فتح کے بعد گروپ اے سے سپر 8 مرحلے کے لیے کوالیفائی کر چکا ہے اور اس کی کارکردگی مسلسل مستحکم رہی ہے۔

پاکستان کو اب سپر 8 مرحلے میں پہنچنے کے لیے اپنا آخری گروپ میچ ہر صورت جیتنا ہوگا، جو 18 فروری کو نمیبیا کے خلاف کھیلا جائے گا۔ اگر پاکستان اس میچ میں کامیابی حاصل کرنے میں ناکام رہا تو وہ ٹورنامنٹ سے باہر ہو سکتا ہے۔ اس صورتحال نے قومی ٹیم پر دباؤ مزید بڑھا دیا ہے اور اب ٹیم کے لیے واپسی کا راستہ محدود ہو گیا ہے۔

بھارت کے خلاف میچ میں پاکستانی بیٹنگ لائن مکمل طور پر ناکام رہی اور کوئی بھی بلے باز طویل اننگز کھیلنے میں کامیاب نہ ہو سکا۔ اس کارکردگی پر شائقین کرکٹ نے سوشل میڈیا پر مایوسی اور تنقید کا اظہار کیا ہے۔ ماہرین کرکٹ کا کہنا ہے کہ پاکستان کو اگلے میچ میں نہ صرف کامیابی حاصل کرنا ہوگی بلکہ بہتر نیٹ رن ریٹ کے لیے نمایاں کارکردگی بھی دکھانا ہوگی تاکہ سپر 8 مرحلے تک رسائی کے امکانات برقرار رہیں۔