By وزیر اعلیٰ سندھ سید مراد علی شاہ نے وزیر اعظم شہباز شریف سے ملاقات کی جس میں مختلف معاملات پر بات چیت ہوئی۔
تفصیلات کے مطابق وزیر اعظم نے سندھ میں وفاقی حکومت کے جاری تمام ترقیاتی منصوبوں پر کام تیز کرنے کی ہدایت کر دی ۔ شہباز شریف کا وزیر اعلیٰ سندھ سید مراد علی شاہ سے ملاقات کے دوران کہنا تھا کہ ملک کا معاشی استحکام ہمارا بنیادی مقصد ہے۔ بدھ کو وزیراعظم آفس کے میڈیا ونگ کی جانب سے جاری کی گئی پریس ریلیز کے مطابق وزیراعظم شہباز شریف نے وزیر اعلیٰ سندھ مراد علی شاہ کو صوبے میں وفاقی حکومت کے جاری تمام ترقیاتی منصوبوں پر کام کی رفتار کو تیز کرنے کی ہدایت کی۔ اس موقع پر وفاقی وزراء احسن اقبال، احد خان چیمہ، سردار اویس خان لغاری، ڈپٹی چیئرمین پلاننگ کمیشن جہانزیب خان اور متعلقہ اعلیٰ حکام بھی موجود تھے۔ وزیراعظم شہباز شریف نے صوبائی حکومت کو درپیش تمام ترقیاتی مسائل اور ان کے تحفظات فوری طور پردور کرنے کی ہدایت کر دی ۔
وزیر اعظم نے سندھ میں وفاقی حکومت کے جاری تمام ترقیاتی منصوبوں پر کام کو تیز کرنے کی ہدایت کرتے ہوئے کہا کہ ملکی معیشت کی بحالی کے لیے وفاق اور صوبوں کے مابین اشتراک ضروری ہے۔ ان کا کہنا تھا کہ ملک کا معاشی استحکام ہمارا بنیادی مقصد ہے اور پاکستان کی مجموعی ترقی اور خوشحالی کے لیے ہمیں متحد ہو کر مسائل کے حل تلاش کرنا ہوں گے۔ ان کا کہنا تھا کہ ملک کے مسائل کا حل ہماری اولین ترجیحات میں شامل ہے ۔ شہباز شریف نے متعلقہ وفاقی وزراء کو سندھ حکومت کے مالی و اقتصادی اور دیگر مسائل کا پائیدار حل تلاش کرنے کی ہدایت کی۔ انہوں نے آئندہ سال کے ترقیاتی بجٹ کی تیاری میں تمام صوبوں کو اعتماد میں لینے اور ان کی مشاورت کو شامل کرنے کا حکم بھی دے دیا۔
