پاکستان کی بڑی سفارتی کامیابی، لبنان جنگ بندی پر عملدرآمد شروع

خطے میں جاری کشیدگی کے دوران ایک بڑی سفارتی پیش رفت سامنے آئی ہے، جہاں پاکستان کی کوششوں کے نتیجے میں اسرائیل اور لبنان کے درمیان جنگ بندی معاہدے پر باقاعدہ عملدرآمد شروع ہو گیا ہے۔ اس پیش رفت کو مشرقِ وسطیٰ میں امن کی جانب ایک اہم قدم قرار دیا جا رہا ہے۔

امریکی صدر ڈونلڈ ٹرمپ کی جانب سے اعلان کردہ دس روزہ جنگ بندی معاہدہ اب عملی شکل اختیار کر چکا ہے، جس کے تحت دونوں فریقین نے کشیدگی کم کرنے پر آمادگی ظاہر کی ہے۔ اس معاہدے کا مقصد فوری طور پر جاری جھڑپوں کو روکنا اور مذاکرات کے لیے سازگار ماحول فراہم کرنا ہے۔

 یہ بھی پڑھیں :لبنان جنگ بندی،سپیکر ایرانی پارلیمنٹ محمد باقر قالیباف کافیلڈ مارشل عاصم منیر کی کوششوں کا اعتراف

لبنان کے صدر جوزف عون نے اس معاہدے کا خیر مقدم کرتے ہوئے اسے امن کے قیام کی جانب مثبت پیش رفت قرار دیا، جبکہ اسرائیلی وزیر اعظم نے بھی اس موقع کو خطے میں استحکام کے لیے ایک تاریخی موقع قرار دیا ہے۔دوسری جانب ایران کے حمایت یافتہ گروپ حزب اللہ نے بھی بعض شرائط کے ساتھ جنگ بندی کی پاسداری کا عندیہ دیا ہے، جس سے اس معاہدے کی کامیابی کے امکانات مزید بڑھ گئے ہیں۔ جنگ بندی سے قبل اسرائیلی افواج اور حزب اللہ کے درمیان شدید جھڑپیں اور حملوں کا تبادلہ جاری تھا، جس نے خطے کو ایک بڑے تصادم کے دہانے پر لا کھڑا کیا تھا۔

پاکستان کی سفارتی کاوشوں نے اس پیش رفت میں اہم کردار ادا کیا ہے، جس کے نتیجے میں نہ صرف فوری کشیدگی میں کمی آئی ہے بلکہ مستقبل میں مذاکرات کی راہ بھی ہموار ہوئی ہے۔ یہ معاہدہ اگر کامیابی سے جاری رہا تو خطے میں پائیدار امن کے امکانات مزید روشن ہو سکتے ہیں۔