ایران اسرائیل کشیدگی، چین کا اظہار تشویش، فوری جنگ بندی کا مطالبہ

چین نے ایران، امریکا اور اسرائیل کے درمیان جاری کشیدگی پر گہری تشویش کا اظہار کرتے ہوئے تمام فریقین سے فوری جنگ بندی کا مطالبہ کیا ہے۔ چینی وزارت خارجہ کی جانب سے جاری بیان میں کہا گیا کہ موجودہ صورتحال نہ صرف مشرق وسطیٰ بلکہ عالمی امن و استحکام کے لیے بھی خطرہ بن سکتی ہے۔

بیان میں اس بات پر زور دیا گیا کہ ایران کی قومی خودمختاری، سلامتی اور علاقائی سالمیت کا مکمل احترام کیا جانا چاہیے۔ چینی حکام کے مطابق کسی بھی قسم کی جارحانہ کارروائی خطے میں عدم استحکام کو مزید بڑھا سکتی ہے، جس کے اثرات عالمی معیشت اور توانائی کی منڈیوں تک پھیل سکتے ہیں۔

چین نے تمام متعلقہ فریقین پر زور دیا ہے کہ وہ کشیدگی میں اضافے سے گریز کریں اور تحمل کا مظاہرہ کرتے ہوئے مذاکرات کی راہ اختیار کریں۔ وزارت خارجہ کے مطابق سفارتی ذرائع ہی موجودہ بحران کا سب سے مؤثر اور پائیدار حل فراہم کر سکتے ہیں۔ بیان میں عالمی برادری سے بھی اپیل کی گئی کہ وہ خطے میں امن و استحکام کے قیام کے لیے مشترکہ اور ذمہ دارانہ کردار ادا کرے۔

یہ بھی پڑھیں :ایران اسرائیل کشیدگی: دبئی ایئرپورٹ بند کردیا گیا، تمام فضائی آپریشنز معطل

چین نے باہمی احترام، بین الاقوامی قوانین کی پاسداری اور فوری سفارتی رابطوں کی ضرورت پر زور دیتے ہوئے کہا کہ ایران–امریکا–اسرائیل کشیدگی کو کم کرنے کے لیے مربوط عالمی کوششیں ناگزیر ہیں۔ چینی قیادت کے مطابق تصادم کے بجائے بات چیت ہی خطے کو مزید تباہی سے بچا سکتی ہے اور دیرپا امن کی بنیاد رکھ سکتی ہے۔