تحریکِ انصاف کے رکن صوبائی اسمبلی فضل الٰہی کی رہائش گاہ پر دستی بم حملہ؛ خوش قسمتی سے تمام اہل خانہ محفوظ

پشاور ہزارخوانی میں پاکستان تحریک انصاف کے رکن صوبائی اسمبلی فضل الٰہی کے گھر پر ہینڈ گرنیڈ دھماکہ ہوا۔ واقعے میں کوئی جانی نقصان نہیں ہوا، تاہم گھر کے گیٹ کو نقصان پہنچا۔

تفصیلات کے مطابق خیبرپختونخوا اسمبلی کے رکن اور پاکستان تحریکِ انصاف کے سینئر رہنما فضل الٰہی کی رہائش گاہ پر رات گئے ایک دستی بم سےحملہ کیا گیا، تاہم اس واقعے میں اللہ کے فضل سے کوئی جانی نقصان نہیں ہوا۔ نامعلوم موٹر سائیکل سواروں نے رکنِ صوبائی اسمبلی کے گھر پر ہینڈ گرنیڈ پھینکا جو گھر کے بیرونی گیٹ کے قریب زوردار دھماکے سے پھٹ گیا۔

دھماکے کی شدت سے گھر کے مرکزی دروازے اور دیوار کو جزوی نقصان پہنچا ہے، لیکن گھر کے اندر موجود فضل الٰہی اور ان کے خاندان کے تمام افراد مکمل طور پر محفوظ ہیں۔ واقعے کی اطلاع ملتے ہی پولیس اور سیکیورٹی فورسز کی بھاری نفری جائے وقوعہ پر پہنچ گئی اور علاقے کو گھیرے میں لے کر شواہد اکٹھے کرنا شروع کر دیے ہیں۔

ضلعی انتظامیہ اور پولیس حکام کا کہنا ہے کہ سی سی ٹی وی فوٹیج کی مدد سے ملزمان کا سراغ لگایا جا رہا ہے اور جلد ہی انہیں قانون کے کٹہرے میں لایا جائے گا۔ فضل الٰہی نے اس موقع پر اپنے حامیوں کو پرامن رہنے کی اپیل کرتے ہوئے کہا ہے کہ وہ خیریت سے ہیں اور اس طرح کے واقعات ان کے عوامی مشن کی راہ میں رکاوٹ نہیں بن سکتے۔ سیاسی حلقوں کی جانب سے اس حملے کی شدید مذمت کی جا رہی ہے اور عوامی نمائندوں کی سیکیورٹی کو مزید سخت کرنے کا مطالبہ کیا گیا ہے۔