By مشرقِ وسطیٰ میں تیزی سے بگڑتی ہوئی صورتحال اور ایران کے ‘آپریشن وعدہ صادق 4’ کے بعد امریکی صدر ڈونلڈ ٹرمپ نے ایران کے خلاف ممکنہ فوجی کارروائی کے دورانیے کے حوالے سے ایک اہم اور دو ٹوک بیان جاری کیا ہے۔
وائٹ ہاؤس میں میڈیا سے گفتگو کرتے ہوئے صدر ٹرمپ نے کہا کہ ایران کے خلاف جنگ کی نوعیت غیر یقینی ہو سکتی ہے۔ امریکی صدر کا کہنا تھا کہ “ایران کے خلاف جنگ طویل بھی ہو سکتی ہے، لیکن اگر ہم نے اپنی پوری فوجی قوت کا استعمال کیا تو یہ چند ہی دنوں میں ختم بھی ہو سکتی ہے۔”
انہوں نے واضح کیا کہ امریکہ کسی بھی صورتحال کے لیے تیار ہے اور ایران کی جانب سے امریکی اڈوں پر کیے جانے والے حالیہ حملوں کا جواب دینے کے لیے تمام آپشنز میز پر موجود ہیں۔
صدر ٹرمپ نے مزید کہا کہ وہ خطے میں ایک وسیع تر جنگ نہیں چاہتے، لیکن امریکی جانوں اور مفادات کا تحفظ ان کی اولین ترجیح ہے۔ دفاعی ماہرین صدر ٹرمپ کے اس بیان کو ایک “وارننگ” قرار دے رہے ہیں، جس کا مقصد ایران کو مزید اشتعال انگیزی سے باز رکھنا اور یہ باور کروانا ہے کہ امریکہ کے پاس فضائی اور تکنیکی برتری موجود ہے جو جنگ کا پانسہ کسی بھی وقت پلٹ سکتی ہے۔
اس بیان کے بعد عالمی سفارتی حلقوں میں کھلبلی مچ گئی ہے اور کئی ممالک نے فریقین سے تحمل کا مظاہرہ کرنے کی اپیل کی ہے تاکہ دنیا کسی بڑی عالمی تباہی سے بچ سکے۔
مزید پڑھیں: رائٹرز کی وضاحت: ایران کے سپریم لیڈر کی شہادت سے متعلق خبروں کی تردید
