ایرانی سپریم لیڈر آیت اللہ علی خامنہ ای کی تدفین کب اور کہاں ہوگی؟ اعلان ہو گیا

ایران کے سپریم لیڈر آیت اللہ علی خامنہ ای کی تدفین مقدس شہر مشہد میں کی جائے گی۔ تدفین سے قبل دارالحکومت تہران میں ایک بڑا تعزیتی اجتماع منعقد ہوگا جس میں ملکی قیادت، مذہبی شخصیات اور عوام کی بڑی تعداد شرکت کرے گی۔

یہ بھی پڑھیں:آیت اللہ علی خامنہ ای پر حملہ اُمت مسلمہ کے خلاف جنگی جرائم کے مترادف ہوگا، آیت اللہ ناصر شیرازی

ایرانی میڈیا رپورٹس کے مطابق تعزیتی اجتماع آج سے جمعے تک امام خمینی ہال میں جاری رہے گا، جہاں مرحوم رہنما کو خراج عقیدت پیش کیا جائے گا۔ اس موقع پر قرآن خوانی، خصوصی دعائیں اور سرکاری سطح پر تعزیتی تقاریب کا اہتمام کیا جائے گا۔ تاہم مشہد میں تدفین کے حتمی دن کا باضابطہ اعلان تاحال نہیں کیا گیا۔

مشہد میں تدفین کی اہمیت

مشہد ایران کا ایک نہایت اہم مذہبی شہر ہے اور یہاں ملک بھر سے لاکھوں زائرین آتے ہیں۔ سپریم لیڈر کی تدفین مشہد میں کیے جانے کا فیصلہ مذہبی اور علامتی اہمیت کا حامل ہو سکتا ہے، جس کا مقصد عوامی جذبات کو مدنظر رکھنا اور قومی یکجہتی کو فروغ دینا ہے۔

نئی قیادت سے متعلق غیر معمولی دعویٰ

دوسری جانب ایرانی قیادت کے حوالے سے ایک غیر معمولی دعویٰ بھی سامنے آیا ہے۔ اسرائیلی میڈیا رپورٹس میں کہا گیا ہے کہ اسرائیل اور امریکا کے مشترکہ حملے میں شہید ہونے والے سپریم لیڈر کے بعد ان کے صاحبزادے مجتبیٰ خامنہ ای کو ایران کا نیا سپریم لیڈر منتخب کر لیا گیا ہے۔

مزید پڑھیں:ایران پر حملہ، انتشار سے دشمن مضبوط ہوگا، ملک کو کمزور نہ کریں، علامہ شیخ حسن جعفری کا نوجوانوں کے نام اہم پیغام جاری

تاہم اس دعوے کی ایرانی سرکاری حلقوں کی جانب سے کوئی باضابطہ تصدیق نہیں کی گئی۔ نہ ہی ایرانی حکام نے اس حوالے سے کوئی واضح بیان جاری کیا ہے۔ سیاسی تجزیہ کاروں کا کہنا ہے کہ ایران میں سپریم لیڈر کے انتخاب کا باقاعدہ آئینی طریقہ کار موجود ہے جس کے تحت مجلس خبرگان رہبر فیصلہ کرتی ہے، اس لیے کسی بھی دعوے کی تصدیق سرکاری اعلان کے بغیر ممکن نہیں۔

خطے میں بے چینی

ان اطلاعات کے بعد مشرق وسطیٰ میں بے چینی کی فضا پائی جا رہی ہے۔ اگر قیادت میں اچانک تبدیلی واقع ہوئی ہے تو اس کے اثرات نہ صرف ایران بلکہ پورے خطے کی سیاست پر مرتب ہو سکتے ہیں۔ فی الحال تمام نظریں تہران پر مرکوز ہیں جہاں سرکاری اعلان کا انتظار کیا جا رہا ہے۔