دورۂ بنگلہ دیش کے لیے قومی ٹیم کا اعلان، اہم کھلاڑی باہر، کپتان برقرار

پاکستان کرکٹ بورڈ نے بنگلہ دیش کے خلاف آئندہ ون ڈے سیریز کے لیے 15 رکنی اسکواڈ کا اعلان کر دیا ہے جس میں بڑے پیمانے پر تبدیلیاں کی گئی ہیں۔ سب سے چونکا دینے والا فیصلہ سابق کپتان بابراعظم اور نوجوان اوپنر صائم ایوب کو اسکواڈ سے باہر کر دیا گیا ہے۔

یہ بھی پڑھیں:قومی ٹیم کے جارحانہ بیٹر فخر زمان سے متعلق اہم خبرآگئی

بورڈ نے واضح کیا ہے کہ تیز رفتار گیند باز شاہین شاہ آفریدی 50 اوورز کے فارمیٹ میں قیادت جاری رکھیں گے۔ شاہین کی قیادت پر اعتماد کا اظہار کرتے ہوئے بورڈ نے کہا کہ ٹیم ایک نئے کمبی نیشن کے ساتھ آگے بڑھ رہی ہے اور مستقبل کے اہداف کو مدنظر رکھتے ہوئے فیصلے کیے گئے ہیں۔

حکمت عملی میں بڑی تبدیلی کا اشارہ

بابراعظم کو ون ڈے اسکواڈ سے باہر رکھنا حالیہ عرصے کا سب سے بڑا انتخابی فیصلہ قرار دیا جا رہا ہے۔ ذرائع کے مطابق سلیکشن کمیٹی ٹیم میں توازن اور جارحانہ انداز لانے کے لیے نئے کھلاڑیوں کو موقع دینا چاہتی ہے۔ صائم ایوب کی عدم شمولیت بھی اسی حکمت عملی کا حصہ سمجھی جا رہی ہے۔

کرکٹ تجزیہ کاروں کے مطابق یہ فیصلے اس بات کی نشاندہی کرتے ہیں کہ انتظامیہ آئندہ بین الاقوامی مقابلوں سے قبل نئی بنیادوں پر ٹیم تشکیل دینا چاہتی ہے۔

نئی شمولیات اور کمبی نیشن

اسکواڈ میں متعدد نئے اور تجربہ کار کھلاڑی شامل کیے گئے ہیں جن میں عبدالصمد، ابرار احمد، فہیم اشرف، فیصل اکرم اور حارث رؤف شامل ہیں۔ حسین طلعت، معاذ صداقت، محمد رضوان، محمد وسیم جونیئر، محمد غازی غوری، سعد مسعود، صاحبزادہ فرحان، سلمان علی آغا اور شمیل حسین بھی ٹیم کا حصہ ہوں گے۔

مزید پڑھیں:نیوزی لینڈ کیخلاف ہوم سیریز کیلئے قومی ٹیم کا اعلان جلد متوقع

محمد رضوان اور محمد غازی غوری وکٹ کیپنگ کی ذمہ داریاں سنبھالیں گے جبکہ بیٹنگ اور باؤلنگ میں متوازن کمبی نیشن بنانے کی کوشش کی گئی ہے۔

مکمل 15 رکنی اسکواڈ میں شاہین شاہ آفریدی کپتان، عبدالصمد، ابرار احمد، فہیم اشرف، فیصل اکرم، حارث رؤف، حسین طلعت

معاذ صداقت، محمد رضوان وکٹ کیپر، محمد وسیم جونیئر، محمد غازی غوری وکٹ کیپر، سعد مسعود، صاحبزادہ فرحان، سلمان علی آغا، شمیل حسین شامل ہیں۔

ڈھاکہ میں سیریز کا شیڈول

پاکستان اور بنگلہ دیش کے درمیان 3 میچوں پر مشتمل ون ڈے سیریز 11 مارچ سے 15 مارچ تک ڈھاکہ میں کھیلی جائے گی۔ تمام میچز شیر بنگلا اسٹیڈیم میں ہوں گے جہاں میزبان ٹیم کو ہوم گراؤنڈ کا فائدہ حاصل ہوگا۔ یہ سیریز نئی قیادت اور نئے کھلاڑیوں کے لیے اہم امتحان ہوگی۔ سلیکشن کمیٹی کو امید ہے کہ تازہ خون ٹیم میں نئی توانائی اور جارحانہ سوچ لائے گا۔