پٹرول کی دستیابی سے متعلق حکومت کا بڑا فیصلہ،صوبائی حکومتوں کو آگاہ کر دیا

پیٹرولیم مصنوعات کی غیرقانونی ذخیرہ اندوزی اور مصنوعی قلت کو روکنے کے لیے حکومت نے پیٹرولیم مصنوعات کی سپلائی چین کی کڑی نگرانی کا فیصلہ کر لیا ہے اور اس مقصد کے لیے ڈیجیٹل ٹریکنگ سسٹم متعارف کرانے کی تیاری شروع کر دی گئی ہے۔

ذرائع کے مطابق آئل اینڈ گیس ریگولیٹری اتھارٹی (اوگرا) کی سفارش پر پیٹرولیم مصنوعات کی درآمد سے لے کر پیٹرول پمپس تک فراہمی کے تمام مراحل کی ڈیجیٹل مانیٹرنگ کی جائے گی تاکہ تیل کی ترسیل اور فروخت کے عمل کو شفاف بنایا جا سکے۔ اس نظام کے تحت یہ ریکارڈ رکھا جائے گا کہ ڈپو سے کتنا تیل نکلا، کہاں پہنچا اور کتنی مقدار فروخت ہوئی۔

حکام کا کہنا ہے کہ اس اقدام کا مقصد ملک میں پیٹرولیم مصنوعات کی مصنوعی قلت کو روکنا اور ذخیرہ اندوزی جیسے غیرقانونی عمل کی مؤثر روک تھام کرنا ہے۔ اس سلسلے میں وفاقی حکومت نے تمام صوبائی حکومتوں کو بھی ہدایات جاری کر دی ہیں کہ وہ اس نظام کے نفاذ میں مکمل تعاون کریں اور غیرقانونی سرگرمیوں کے خلاف سخت کارروائی یقینی بنائیں۔

یہ بھی پڑھیں:وزیر اعظم آج کون سے اہم فیصلے کریں گے،قوم کی نظریں اسلام آباد پر لگ گئیں

ذرائع کے مطابق نئے نظام کے تحت صرف رجسٹرڈ پیٹرول پمپس کو ہی پیٹرول اور ڈیزل فراہم کیا جائے گا، جبکہ کسی غیر رجسٹرڈ پمپ یا غیر مجاز خریدار کو فراہمی کی صورت میں سخت کارروائی عمل میں لائی جائے گی۔

مزید بتایا گیا ہے کہ سپلائی چین سے متعلق تمام ڈیٹا اور ریکارڈ وزارت توانائی، قانون نافذ کرنے والے اداروں اور فیڈرل بورڈ آف ریونیو (ایف بی آر) کو بھی دستیاب ہوگا تاکہ نگرانی کے عمل کو مزید مؤثر بنایا جا سکے اور کسی بھی بے ضابطگی کی فوری نشاندہی کی جا سکے۔