بین الاقوامی سطح پر معتبر کیو ایس ورلڈ یونیورسٹی رینکنگز نے سال 2026 کیلئے کمپیوٹر سائنس اور انفارمیشن سسٹمز کی تازہ رینکنگ جاری کر دی ہے، جس میں دنیا بھر کی ممتاز جامعات کی کارکردگی کو اجاگر کیا گیا ہے۔ اس فہرست میں پاکستان کی (پنجاب یونیورسٹی) نے بھی نمایاں مقام حاصل کرتے ہوئے 351 سے 400 کے درمیان درجہ بندی میں جگہ بنائی ہے۔
رپورٹ کے مطابق کمپیوٹر سائنس کے شعبے میں اس سال بھی Massachusetts Institute of Technology (میساچوسٹس انسٹی ٹیوٹ آف ٹیکنالوجی) بدستور دنیا کی نمبر ون یونیورسٹی قرار پائی ہے، جو اپنی جدید تحقیق، جدت اور تعلیمی معیار کے باعث عالمی سطح پر سرفہرست ہے۔
رینکنگ میں امریکی جامعات کی برتری واضح رہی، جہاں Stanford University (سٹینفورڈ یونیورسٹی) اور Carnegie Mellon University (کارنیگی میلن یونیورسٹی) بھی ٹاپ 10 میں نمایاں پوزیشنز حاصل کرنے میں کامیاب رہیں۔ ان اداروں کو مصنوعی ذہانت، ڈیٹا سائنس اور سافٹ ویئر انجینئرنگ جیسے شعبوں میں عالمی قیادت حاصل ہے۔
امریکا سے باہر بھی کئی جامعات نے بہترین کارکردگی دکھائی، جن میں National University of Singapore (نیشنل یونیورسٹی آف سنگاپور) اور University of Oxford (یونیورسٹی آف آکسفورڈ) مشترکہ طور پر چوتھے نمبر پر رہیں، جو ایشیا اور یورپ میں اعلیٰ تعلیم کے معیار کی عکاسی کرتی ہیں۔
ماہرین تعلیم کے مطابق کیو ایس رینکنگ طلبہ کیلئے نہایت اہم رہنمائی فراہم کرتی ہے، کیونکہ اس میں تعلیمی معیار، تحقیق، اساتذہ کی مہارت اور عالمی شہرت جیسے عوامل کو مدنظر رکھا جاتا ہے۔ اس فہرست کے ذریعے طلبہ کو اپنی تعلیم کیلئے بہترین اداروں کے انتخاب میں مدد ملتی ہے۔
تعلیمی حلقوں کا کہنا ہے کہ پنجاب یونیورسٹی کی اس کامیابی سے نہ صرف پاکستان کے تعلیمی معیار کی عکاسی ہوتی ہے بلکہ یہ ملک میں اعلیٰ تعلیم کے فروغ کیلئے بھی ایک مثبت پیش رفت ہے۔
By 
