By پنجاب حکومت نے صوبے بھر میں امن و امان کی صورتحال کو مزید مستحکم کرنے اور سنگین جرائم کے خاتمے کے لیے ایک بڑا قدم اٹھاتے ہوئے کرائم کنٹرول ڈیپارٹمنٹ (سی سی ڈی) میں ایک ہزار نئی بھرتیوں کی باقاعدہ منظوری دے دی ہے۔
تفصیلات کے مطابق وزیر اعلی پنجاب کی زیرِ صدارت ہونے والے حالیہ صوبائی کابینہ کے اجلاس میں اس اہم منصوبے کے لیے رواں مالی سال 2025/26 کے سپلیمنٹری بجٹ سے 491 ملین روپے کے بھاری فنڈز جاری کرنے کی بھی منظوری دی گئی ہے۔
یہ فیصلہ ایک ایسے وقت میں سامنے آیا ہے جب سی سی ڈی کو نفری کی شدید کمی کا سامنا ہے، کیونکہ محکمے کی کل منظور شدہ 7486 اسامیوں میں سے نصف سے زائد یعنی 3582 اسامیاں تاحال خالی پڑی ہیں، جس کی وجہ سے آپریشنل امور میں مشکلات پیش آ رہی تھیں۔
سرکاری مراسلے کے مطابق مارچ 2025 میں قائم ہونے والے اس محکمے نے اب تک جرائم کے خلاف جنگ میں غیر معمولی نتائج حاصل کیے ہیں، جن میں ڈکیتی کی وارداتوں میں 55 فیصد اور قتل کے واقعات میں 45 فیصد تک واضح کمی شامل ہے۔
تاہم، پنجاب پولیس کی نفری کے ایک بڑے حصے کو نئے بننے والے محکمے ’پیرا‘ میں منتقل کیے جانے کے باعث سی سی ڈی کو پولیس سے مزید افرادی قوت فراہم کرنا ممکن نہیں رہا تھا۔ اسی ضرورت کے پیشِ نظر آئی جی پنجاب نے ایک ہزار کانسٹیبلز اور ڈرائیور کانسٹیبلز سمیت مختلف کیڈرز میں افسران کی بھرتی کی سمری ارسال کی تھی جسے اب قانونی طور پر منظور کر لیا گیا ہے۔
بھرتیوں کے اس جامع منصوبے کے تحت نہ صرف فیلڈ فورس بلکہ انتظامی اور قانونی ڈھانچے کو بھی مضبوط بنایا جائے گا، جس میں 8 ایس پی جنرل ایگزیکٹیو، 3 ایس پی لیگل، 19 ڈی ایس پی جنرل ایگزیکٹیو اور 10 ڈی ایس پی لیگل کیڈر کے افسران شامل ہوں گے۔
اس کے علاوہ 51 انسپکٹرز، 141 سب انسپکٹرز، 173 اے ایس آئی، 35 ہیڈ کانسٹیبلز، 100 ڈرائیور کانسٹیبلز اور 460 کانسٹیبلز کا تقرر بھی عمل میں لایا جائے گا۔
ماہرین کا ماننا ہے کہ اس نئی نفری کی شمولیت سے کچے کے علاقوں اور دیگر حساس اضلاع میں خطرناک ڈاکوؤں، منظم جرائم پیشہ گروہوں اور اشتہاری مجرموں کے خلاف جاری کریک ڈاؤن میں تیزی آئے گی اور صوبے کو غیر قانونی اسلحہ سے پاک کرنے کی مہم کو بھی تقویت ملے گی۔
مزید پڑھیں: مریم نواز نے سی سی ڈی سے متعلق بڑا فیصلہ کر لیا
