ایران کے ساتھ معاہدہ مکمل ہوچکا ، ٹرمپ کا آبنائے ہرمز کی ناکہ بندی ختم کرنے کا اعلان

امریکی صدر ڈونلڈ ٹرمپ نے اعلان کیا ہے کہ ایران کے ساتھ معاہدہ طے پا گیا ہے اور دونوں فریقوں کے درمیان ڈیل مکمل ہو چکی ہے۔سوشل میڈیا پر جاری اپنے بیان میں انہوں نے معاہدے کو ایک بڑی سفارتی کامیابی قرار دیتے ہوئے تمام متعلقہ فریقوں کو مبارکباد پیش کی۔

امریکی صدر نے اپنے پیغام میں کہا کہ ایران کے ساتھ معاہدہ مکمل ہونے کے بعد آبنائے ہرمز کو ٹول فری بنیادوں پر کھول دیا گیا ہے جبکہ ایرانی بندرگاہوں پر امریکا کی جانب سے عائد بحری ناکہ بندی بھی ختم کر دی گئی ہے۔ انہوں نے کہا کہ اب دنیا بھر کے تجارتی اور تیل بردار جہاز معمول کی سرگرمیاں دوبارہ شروع کر سکتے ہیں اور عالمی منڈیوں کو تیل کی ترسیل بحال ہونے کا وقت آ گیا ہے۔

 یہ بھی پڑھیں :نیتن یاہو میں سمجھ بوجھ نہیں اسکی وجہ سے معاہدے میں تاخیر ہوئی، اگلے کچھ گھنٹوں میں ڈیل پر دستخط ہونگے،ڈونلڈ ٹرمپ

یہ پیش رفت ایسے وقت میں سامنے آئی ہے جب گزشتہ روز اسرائیل کی جانب سے بیروت پر حملے کے بعد خطے میں کشیدگی بڑھنے کے خدشات پیدا ہو گئے تھے۔ ایران نے حملے کے جواب کا اعلان کیا تھا جس کے باعث مبصرین کو خدشہ تھا کہ جاری سفارتی کوششیں متاثر ہو سکتی ہیں اور مجوزہ امن معاہدہ خطرے میں پڑ سکتا ہے۔

تاہم پاکستان اور قطر کی سفارتی و ثالثی کوششوں کے نتیجے میں فریقین مذاکرات جاری رکھنے پر آمادہ ہوئے اور بالآخر معاہدہ طے پا گیا۔ ذرائع کے مطابق کئی روز سے جاری رابطوں اور پس پردہ سفارت کاری نے معاہدے کی راہ ہموار کرنے میں اہم کردار ادا کیا۔

وزیراعظم نے معاہدے کا اعلان کرتے ہوئے اسے خطے اور دنیا میں امن کے لیے ایک اہم پیش رفت قرار دیا، جبکہ امریکی صدر ڈونلڈ ٹرمپ کی جانب سے بھی اس معاہدے کی تصدیق سامنے آنے کے بعد اس کی اہمیت مزید بڑھ گئی ہے۔