By پاکستان سپر لیگ کے 11 ویں ایڈیشن کے دوسرے سنسنی خیز مقابلے میں کراچی کنگز نے کوئٹہ گلیڈی ایٹرز کو 14 رنز سے شکست دے کر ٹورنامنٹ میں فاتحانہ آغاز کیا ہے۔
لاہور کے قذافی اسٹیڈیم میں کھیلے گئے اس میچ میں کوئٹہ گلیڈی ایٹرز کے کپتان نے ٹاس جیت کر پہلے فیلڈنگ کا فیصلہ کیا، تاہم کراچی کنگز کے بلے بازوں نے مقررہ 20 اوورز میں 7 وکٹوں کے نقصان پر 181 رنز کا مجموعہ ترتیب دے کر حریف ٹیم کے لیے ایک مشکل ہدف سیٹ کیا۔
کراچی کنگز کی اننگز میں انگلش آل راؤنڈر معین علی نے جارحانہ بلے بازی کا مظاہرہ کرتے ہوئے محض 29 گیندوں پر 48 رنز کی ناقابلِ شکست اننگز کھیلی، جس میں تین بلند و بالا چھکے اور چار چوکے شامل تھے۔ کپتان ڈیوڈ وارنر نے 35 اور نوجوان مرزا سعد بیگ نے 30 رنز بنا کر ٹیم کے اسکور کو مستحکم کرنے میں اہم کردار ادا کیا۔ کوئٹہ کی جانب سے احمد دانیال تین اور الزاری جوزف دو وکٹیں حاصل کر کے نمایاں بولر رہے۔
182 رنز کے تعاقب میں کوئٹہ گلیڈی ایٹرز کا آغاز انتہائی شاندار رہا جہاں اوپنرز شامل حسین اور سعود شکیل نے 79 رنز کی شراکت داری قائم کی۔ شامل حسین نے محض 24 گیندوں پر 52 رنز کی برق رفتار ففٹی اسکور کی جبکہ سعود شکیل نے 33 رنز بنائے۔
ایک موقع پر ایسا محسوس ہو رہا تھا کہ کوئٹہ یہ میچ آسانی سے جیت لے گا، لیکن کراچی کے تجربہ کار فاسٹ بولر حسن علی نے اپنی نپی تلی بولنگ سے میچ کا نقشہ پلٹ دیا۔ حسن علی نے صرف 27 رنز کے عوض 4 اہم وکٹیں حاصل کر کے کوئٹہ کی بیٹنگ لائن کی کمر توڑ دی۔
کوئٹہ کے مڈل آرڈر بلے باز رائلی روسو اور بین میکڈرموٹ 25، 25 رنز بنانے کے باوجود اپنی ٹیم کو فتح کی دہلیز تک نہ پہنچا سکے اور پوری ٹیم مقررہ اوورز میں 7 وکٹوں پر 167 رنز تک ہی محدود رہی۔ اس جیت کے ساتھ کراچی کنگز نے پوائنٹس ٹیبل پر قیمتی دو نمبر حاصل کر لیے ہیں جبکہ حسن علی کو ان کی میچ وننگ پرفارمنس پر سراہا جا رہا ہے۔
مزید پڑھیں: پاکستان کے مایہ ناز کرکٹر فخر زمان کا پی ایس ایل میں ایک اور اعزاز
