جنگ بندی کے اعلان کے بعد عالمی مارکیٹ میں تیل کی قیمتیں تیزی سے گر گئیں

عالمی منڈی میں خام تیل کی قیمتوں میں نمایاں کمی ریکارڈ کی گئی ہے، جو حالیہ دنوں میں دنیا بھر کے لیے ایک بڑی مثبت پیش رفت کے طور پر سامنے آئی ہے۔ یہ کمی ایسے وقت میں ہوئی ہے جب چند روز قبل امریکا ایران جنگ کے آغاز کے بعد تیل کی قیمتوں میں غیر معمولی تیزی دیکھنے میں آئی تھی۔

ابتدائی طور پر جنگی خدشات کے باعث عالمی منڈی میں بے یقینی بڑھ گئی تھی، جس کے نتیجے میں برینٹ اور ڈبلیو ٹی آئی دونوں کی قیمتیں تیزی سے اوپر چلی گئیں۔ صورتحال اس وقت مزید سنگین ہو گئی جب اہم عالمی گزرگاہ آبنائے ہرمز کی بندش کی اطلاعات سامنے آئیں۔ اس پیش رفت نے عالمی سطح پر توانائی بحران کو شدت دے دی اور تیل کی سپلائی متاثر ہونے کے خدشات نے قیمتوں کو تاریخ کی بلند ترین سطحوں کے قریب پہنچا دیا۔

اس بحران کے اثرات صرف بڑی معیشتوں تک محدود نہیں رہے بلکہ ترقی پذیر ممالک بھی اس کی لپیٹ میں آ گئے۔ پاکستان سمیت کئی ممالک میں مہنگائی میں اضافہ، پیٹرولیم مصنوعات کی قیمتوں میں بے تحاشا اضافہ اور معاشی دباؤ واضح طور پر محسوس کیا گیا۔

یہ بھی پڑھیں:کون سی اشیاء کتنی مہنگی ہوئیں،کراے کتنے بڑھے؟تیار تفصیلی رپورٹ حکومت کو پیش

تاہم اب صورتحال میں بہتری کے آثار نظر آ رہے ہیں۔ ایک جانب جنگ بندی کی خبریں سامنے آئی ہیں، جس سے خطے میں کشیدگی میں کمی کی امید پیدا ہوئی ہے، تو دوسری جانب عالمی منڈی میں تیل کی قیمتوں میں نمایاں کمی بھی ریکارڈ کی گئی ہے۔

رپورٹ کے مطابق برینٹ کروڈ آئل کی قیمت میں 13.40 فیصد کمی ہوئی ہے جس کے بعد یہ 94.63 ڈالر فی بیرل پر آ گئی ہے، جبکہ ڈبلیو ٹی آئی کروڈ آئل کی قیمت میں 15.34 فیصد کمی دیکھی گئی اور یہ 95.62 ڈالر فی بیرل تک گر گئی ہے۔

یوں ایک طرف جنگ بندی کی خبر نے دنیا بھر میں سکون کی فضا پیدا کی ہے تو دوسری جانب تیل کی قیمتوں میں کمی نے عالمی سطح پر ایک اور مثبت اشارہ دیا ہے، جس سے امید کی جا رہی ہے کہ آنے والے دنوں میں معاشی حالات میں بہتری آئے گی۔