روٹی اور نان کی نئی قیمتیں سامنے آگئیں

کراچی میں ایل پی جی کی قیمتوں میں اضافے کے باعث روٹی اور چپاتی مہنگی ہو گئی ہیں، جس سے شہریوں کی مشکلات میں مزید اضافہ ہو گیا ہے۔

تندور مالکان نے پیداواری لاگت بڑھنے کو جواز بناتے ہوئے روٹی اور چپاتی کی قیمتوں میں 5 روپے اضافہ کر دیا ہے، کیونکہ گیس کی قلت کے باعث زیادہ تر دکانیں ایل پی جی استعمال کر رہی ہیں۔

ذرائع کے مطابق ایل پی جی مختلف علاقوں میں 500 سے 530 روپے فی کلو کے درمیان فروخت ہو رہی ہے اور اس کی قیمتیں روزانہ کی بنیاد پر بڑھ رہی ہیں۔

تندور مالکان نے حکام سے مطالبہ کیا ہے کہ قیمتوں میں ہیرا پھیری کرنے والوں کے خلاف سخت کارروائی کی جائے۔ ایک مقامی تندور مالک کا کہنا ہے کہ زیادہ تر تندور ایل پی جی پر منتقل ہو چکے ہیں، جس سے اخراجات میں نمایاں اضافہ ہوا ہے۔

انہوں نے مزید کہا کہ ایل پی جی کی قیمتوں میں اضافے کے باعث دکانداروں کے پاس قیمتیں بڑھانے کے علاوہ کوئی اور راستہ نہیں بچا۔ نئے نرخوں کے مطابق کم وزن روٹی 25 روپے، بڑی روٹی 30 روپے جبکہ چپاتی 20 روپے میں فروخت کی جا رہی ہے۔

یہ بھی پڑھیں: مہنگائی کا نیا طوفان،گھی اور آئل کی قیمتوں میں کتنا اضافہ ہونے جارہا۔بڑی خبر آگئی

دوسری جانب شہریوں نے اشیائے ضروریہ کی بڑھتی ہوئی قیمتوں پر تشویش کا اظہار کرتے ہوئے کہا ہے کہ دودھ کے بعد روٹی کی قیمت میں اضافہ گھریلو بجٹ پر مزید دباؤ ڈال رہا ہے، اور حکومت سے فوری اقدامات کرنے کا مطالبہ کیا ہے۔