امریکا ایران مذاکرات کے دوران میٹرک کے ملتوی پیپرز کا نیا شیڈول جاری

ایجوکیشن بورڈ راولپنڈی نے میٹرک کے ان سالانہ امتحانات کا نیا شیڈول جاری کر دیا ہے جو وفاقی دارالحکومت اسلام آباد میں ہونے والے امریکا اور ایران کے درمیان اہم سفارتی مذاکرات کی وجہ سے ملتوی کر دیے گئے تھے۔

جاری کردہ نئے شیڈول کے مطابق میٹرک کا اردو کا پیپر اب 2 مئی 2026 کو صبح کی شفٹ میں منعقد ہوگا، جبکہ جغرافیہ کا پیپر اسی روز دوسری (سیکنڈ) شفٹ میں لیا جائے گا۔ راولپنڈی بورڈ نے اس حوالے سے باقاعدہ نوٹیفیکیشن جاری کرتے ہوئے تمام متعلقہ اسکولوں اور طلبا کو مطلع کر دیا ہے۔

یہ بھی پڑھیں:فیڈرل بورڈ کے بیرون ملک میٹرک امتحانات ملتوی، ہزاروں طلبہ متاثر

ترجمان بورڈ کا کہنا ہے کہ امتحانات کے وقت اور پہلے سے مقرر کردہ امتحانی مراکز میں کوئی تبدیلی نہیں کی گئی، طلبا اپنے پرانے مراکز میں ہی متعین وقت پر پرچے دے سکیں گے۔ 18 اپریل کو ہونے والے اس اعلان سے ان ہزاروں طلبا اور والدین کا تذبذب ختم ہو گیا ہے جو امتحانات کے التوا کے باعث پریشان تھے۔

مشرقِ وسطیٰ میں جاری تناؤ کے خاتمے کے لیے اسلام آباد اس وقت عالمی سفارت کاری کا مرکز بنا ہوا ہے۔ امریکا اور ایران کے درمیان ہونے والے ان حساس مذاکرات کی وجہ سے جڑواں شہروں میں سیکیورٹی کے غیر معمولی انتظامات کیے گئے تھے، جس کے باعث تعلیمی سرگرمیاں اور امتحانات عارضی طور پر متاثر ہوئے۔

راولپنڈی بورڈ کی جانب سے امتحانات کا التوا طلبا کی حفاظت اور شہر میں ٹریفک و سیکیورٹی کے مسائل سے بچنے کے لیے کیا گیا تھا۔ اب جبکہ صورتحال واضح ہو چکی ہے، بورڈ نے فوری طور پر نیا شیڈول جاری کر کے تعلیمی تسلسل کو بحال کر دیا ہے۔