آزادی مارچ کیس ، عمران خان سمیت دیگر رہنما بری

اسلام آباد کی عدالت نے عمران خان اور پی ٹی آئی کے دیگر رہنماؤں کو آزادی مارچ کیس میں بری کر دیا۔

اسلام آباد کی ڈسٹرکٹ اینڈ سیشن کورٹ نے آزادی مارچ کیس میں سابق وزیراعظم عمران خان اور پی ٹی آئی کے دیگر رہنماؤں کو بری کردیا۔
عدالت نے عمران خان، اسد عمر اور سیف اللہ نیازی کی موجودگی میں محفوظ فیصلہ سنایا جبکہ فیصل جاوید اور زرتاج گل کو حاضری سے استثنیٰ دیا گیا۔ عدالت نے عمران خان، فیصل جاوید، علی نواز اعوان، سیف اللہ نیازی، زرتاج گل اور اسد عمر سمیت پی ٹی آئی رہنماؤں کو آزادی مارچ سے متعلق مقدمات میں بری کردیا۔ عدالتی فیصلہ جوڈیشل مجسٹریٹ مرید عباس خان نے سنایا۔

یہ بھی پڑھیں: گندم درآمد سکینڈل میں ملوث عناصر کی نشاندہی ہو گئی، وزیراعظم شہباز شریف کا بڑا فیصلہ

سماعت کے دوران ایڈووکیٹ نعیم پنجوتھا نے دلائل دیتے ہوئے کہا کہ عمران خان کے خلاف مقدمات سیاسی محرکات پر مبنی ہیں اور الزامات کی حمایت میں کوئی ثبوت نہیں ہے۔ انہوں نے یہ بھی نشاندہی کی کہ ایف آئی آر غیر مجاز افراد کے ذریعہ درج کی گئیں ، جو قانون کے خلاف ہے۔
ایڈووکیٹ سردار مصروف نے دلائل دیتے ہوئے کہا کہ عدالت مقدمات کو آگے نہیں بڑھا سکتی کیونکہ قانون کے خلاف ایف آئی آر درج کی گئی ہیں۔ انہوں نے عدالت سے استدعا کی کہ عمران خان اور پی ٹی آئی کے دیگر رہنماؤں کو باعزت بری کیا جائے۔

عدالت نے دلائل سننے کے بعد فیصلہ محفوظ کرتے ہوئے عمران خان اور پی ٹی آئی کے دیگر رہنماؤں کی بریت کا فیصلہ سنایا۔