زرافہ صرف لمبا نہیں، انتہائی دلچسپ بھی ہے

زرافہ دنیا کے سب سے اونچے زمینی جانوروں میں شمار ہوتا ہے، اور اس کی جسمانی ساخت بھی اتنی ہی حیرت انگیز ہے جتنی اس کی اونچائی۔ ماہرین کے مطابق ایک بالغ زرافے کی زبان تقریباً 45 سے 50 سینٹی میٹر تک لمبی ہو سکتی ہے، جو اسے درختوں کی اونچی شاخوں تک پہنچنے میں مدد دیتی ہے۔

یہ لمبی اور مضبوط زبان زرافے کو ایسے پتے اور ٹہنیاں کھانے کے قابل بناتی ہے جو دوسرے جانوروں کی پہنچ سے باہر ہوتے ہیں۔ یہی وجہ ہے کہ زرافہ زیادہ تر وقت کھانے کی تلاش میں درختوں کی اونچی شاخوں پر گزار دیتا ہے۔

یہ کبھی پڑھیں :کشمیری طرزِ تعمیر کا شاہکار،جس میں ایک بھی کیل استعمال نہیں ہوئی

دلچسپ بات یہ ہے کہ زرافے کی زبان نہ صرف لمبی ہوتی ہے بلکہ انتہائی لچکدار بھی ہوتی ہے۔ اس لچک کی بدولت وہ اپنی زبان کو مختلف زاویوں پر موڑ کر آسانی سے پتے توڑ سکتا ہے اور بعض اوقات اپنے جسم کے مختلف حصوں تک بھی لے جا سکتا ہے، جس سے وہ صفائی میں بھی مدد لیتا ہے۔

زرافے کی زبان کا رنگ بھی خاص اہمیت رکھتا ہے۔ اس کی زبان عام طور پر گہرے نیلے یا جامنی رنگ کی ہوتی ہے، جو اسے تیز دھوپ اور الٹرا وائلٹ شعاعوں سے محفوظ رکھنے میں مدد فراہم کرتا ہے۔ چونکہ زرافہ روزانہ کئی گھنٹے دھوپ میں درختوں سے خوراک حاصل کرتا ہے، اس لیے یہ قدرتی تحفظ اس کے لیے بہت اہم سمجھا جاتا ہے۔

یہ بھی پڑھیں :اندھیرے میں چمکنے والے پودے تیار،سائنسدانوں کا انوکھاکارنامہ

ماہرین کے مطابق زرافہ اپنی زبان کو صرف خوراک حاصل کرنے کے لیے ہی استعمال نہیں کرتا بلکہ یہ اس کے لیے ایک اہم آلہ بھی ہے جس کے ذریعے وہ اپنے جسم کی صفائی اور دیکھ بھال بھی کرتا ہے۔ اس کی یہی خصوصیات اسے قدرتی دنیا کے سب سے منفرد اور دلچسپ جانوروں میں شامل کرتی ہیں۔