کراچی میں میٹرک کا پرچہ ملتوی کر دیا گیا

کراچی میں میٹرک کا پرچہ ملتوی کر دیا گیا

یوم تکبیر کی سرکاری تعطیل کے باعث کراچی میں میٹرک کا امتحان ملتوی کر دیا گیا۔

تفصیلات کے مطابق یوم تکبیر28مئی کو عام تعطیل کی وجہ سے کراچی میں میٹرک کے پرچے کل نہیں ہوں گے۔ وزیر بورڈ و جامعات محمد علی ملکانی کا کہنا ہے کہ میٹرک کے ملتوی ہونیوالے پرچوں کی نئی تاریخ کا اعلان بعد میں کیا جائیگا۔ کراچی یونیورسٹی نے بھی یوم تکبیر کے موقع پر منگل 28اکتوبر کو تعطیل کا اعلان کر دیا ہے۔ کراچی یونیورسٹی کے مطابق یونیورسٹی میں 28مئی کو ہونیوالے امتحانات ملتوی کر دیے گئے ہیں۔

یومِ تکبیر کے موقع پر عوامی تعطیل کا اعلان

وزیراعظم شہباز شریف نے کل یومِ تکبیر کے موقع پر سرکاری تعطیل کا اعلان کر دیا۔ وزیرِ اعظم محمد شہباز شریف نے 28 مئی یوم تکبیر کو سرکاری چھٹی قرار دیتے ہوئے کہا ہے کہ یومِ تکبیر سیاسی اور دفاعی قوتوں کے اس ملک کے دفاع کو مضبوط تر بنانے کیلئے ایک جھنڈے، سبز ہلالی پرچم تلے متحد ہونے کی یاد دلاتا ہے۔ پیر کو وزیراعظم آفس کے میڈیا ونگ سے جاری بیان کے مطابق وزیراعظم نے کہا کہ یوم تکبیر پاکستانی قوم کے ملک کے دفاع کو ناقابل تسخیر بنانے کیلئے اتحاد کی یاد دلاتا ہے۔

آج کے دن پوری قوم نے اس ملک کی سالمیت کیلئے یہ فیصلہ کیا کہ ملکی دفاع پر کسی قسم کا بیرونی دباؤ قبول کرکے سمجھوتہ نہیں کیا جائے گا۔ انہوں نے کہا کہ یومِ تکبیر سیاسی اور دفاعی قوتوں کے اس ملک کے دفاع کو مضبوط تر بنانے کیلئے ایک جھنڈے، سبز ہلالی پرچم تلے متحد ہونے کی یاد دلاتا ہے، یوم تکبیر بیرونی دشمنوں کے ساتھ ساتھ ایسے اندرونی دشمنوں، جو ملک میں انتشار کی سیاست سے اس ملک کو خطرے سے دوچار کرنا چاہتے ہیں، ان کے ناپاک عزائم کو ہمیشہ ناکام بنانے کے عہد کی تجدید کا دن ہے۔ انہوں نے کہا کہ 28 مئی یوم تکبیر، اس وقت کے وزیرِ اعظم میاں محمد نواز شریف اور پاک فوج کے پاکستان کے دفاع کو ناقابل تسخیر بنانے کے اقدام کو خراجِ تحسین پیش کرنے کا دن ہے، اس دن ہم ذوالفقار علی بھٹو کے پاکستان کے ایٹمی پروگرام شروع کرنے اور اسے جاری و ساری رکھنے میں اہم کردار ادا کرنے والے سائنسدانوں کو بھی خراجِ تحسین پیش کرتے ہیں۔

Related Articles

Leave a Reply

Your email address will not be published. Required fields are marked *