By وفاقی وزیر خزانہ محمد اورنگزیب کا کہنا ہے کہ حکومت نے پنشن اصلاحات سے پنشن اخراجات میں کمی کا فیصلہ کیا ہے۔
وفاقی وزیرخزانہ نے قومی اسمبلی میں اظہار خیال کرتے ہوئے کہا کہ حکومت کی جانب سے اسٹیشنری آئٹمز کیلئے سیلز ٹیکس سے استثنیٰ کو برقرار رکھنے پر غور کیا جارہا ہے جبکہ پنشن اصلاحات سے پنشن اخراجات کو کم کیا جائیگا۔ انہوں نے کہا کہ حکومت ایف بی آر میں اصلاحات اور اس کی ڈیجیٹلائزیشن کر رہی ہےاور اس کیلئے بجٹ میں 7ارب روپے مختص کیے گئے ہیں۔ ایف بی آر نے مشکل حالات میں ٹیکس آمدن میں 30فیصد اضافہ کیا ہے۔ ٹیکس ٹو جی ڈی پی ریشو کو 13فیصد تک بڑھانے کیلئے پرعزم ہیں جبکہ قومی ائیرلائن کی نجکاری کے عمل کو بھی تیز کر رہے ہیں۔ وزیر خزانہ کا کہنا ہے کہ کوشش کریں گے اگلا آئی ایم ایف پروگرام آخری پروگرام ہو۔
مزید پڑھیں: تنخواہ دار طبقے پر ٹیکس کا بوجھ کم کرنے اور مزدور کی کم از کم ماہانہ اجرت 45 ہزار روپے مقرر کرنے کی سفارش
وزیر خزانہ نے مزید کہا کہ ٹیکس اصلاحات کے ذریعے ٹیکس کا دائرہ کار بڑھا رہے ہیں، تاجروں کا ٹیکس نیٹ میں آنا ضروری ہےاور انہیں ٹیکس دائرے میں لایا جائیگا۔ جو دکاندار تاجر اسکیم کا حصہ نہیں بنیں گے ان کیخلاف سخت اقدامات ہوں گےجبکہ نان فائلرز کو پرسنل ہئیرنگ کا موقع دیا گیا ہے۔ انہوں نے یہ بھی کہا کہ پنشن اصلاحات سے پنشن اخراجات کو کم کیا جائیگا، کچھ وزارتوں کو بند کرنے یا صوبوں کو دینے کی تجاویز کےلیے کمیٹی بنائی گئی ہے۔
