یوٹیلیٹی اسٹورز پر عوام کو ریلیف دینے کیلئے نیا پیکج تیار کر لیا گیا

حکومت نے عوام کو بڑا ریلیف دینے کی تیاریاں کر لیں۔

تفصیلات کے مطابق یوٹیلیٹی اسٹورز پر عوام کو ریلیف دینے کے لیے وزیراعظم کا نیا ریلیف پیکج منظوری کیلئے ای سی سی کو بھجوا دیا گیا۔ریلیف پیکج کا اطلاق ای سی سی اور وفاقی کابینہ کی منظوری کے بعد ہو گا۔ تجویز کے مطابق یوٹیلیٹی اسٹورز پر وزیراعظم کے نئے پیکیج کا اطلاق یکم اگست سے ہوگا۔

مزید پڑھیں: متوسط طبقے کو بجلی کے بلوں میں ریلیف دیا جائے، نوازشریف

نئے ریلیف پیکیج کے تحت یوٹیلیٹی اسٹورز پر دالوں، چاول پر سبسڈی میں300 فیصد اضافے اور آٹے پر سبسڈی کا موجودہ ماڈل برقرار رکھنے کی تجویز ہے۔ حکام کااس حوالے سے کہنا ہے کہ وزیراعظم پیکیج کے تحت یوٹیلیٹی اسٹورز پر پانچ بنیادی اشیاء پر سبسڈی دی جا رہی ہے۔

چینی، گھی، آٹا، چاول اور دالوں پر بے نظیر انکم سپورٹ پروگرام صارفین کو سبسڈی دی جا رہی ہے۔بجٹ میں یوٹیلیٹی اسٹورز پر وزیراعظم اور رمضان پیکیج کے لیے 65 ارب روپے مختص کیے گئے ہیں۔

وزیر اعظم ریلیف پیکیج کے لیے رواں مالی سال 55 ارب روپے مختص کیے گئے ہیں جبکہ گزشتہ مالی سال وزیرِ اعظم پیکیج کے تحت 35 ارب روپے مختص کیے گئے تھے۔