By وزیراعظم شہباز شریف نے کہا ہے کہ یوم عاشور بے شمار فضائل کی وجہ سے خاص اہمیت کا حامل ہے، اس دن نواسہ رسول ؓ نے حق اور باطل کی لڑائی میں جانوں کا نذرانہ د یکر حق کو حقیقی فتح دلوائی۔
تفصیلات کے مطابق وزیراعظم نےیوم عاشور کے موقع پر اپنے پیغام میں کہاکہ کربلا کے میدان میں شہیدوں نے جان کی قربانی دے کر یہ ثابت کر دیا کہ حق لازوال اور باطل مٹنے کے لیے ہے۔
شہباز شریف نے کہا کہ حضرت امام حسین ؓ نے میدان کربلا میں یزید کی جابرانہ حکومت کیخلاف جرات و استقامت کامظاہرہ کیا ۔ امام حسینؓ کی شہادت ہمیں باطل اور ظلم کے خلاف ڈٹ جانے کا درس دیتی ہے۔
وزیراعظم نے مزید کہا کہ آج کے دن ہمیں اس عزم کا اعادہ کرنا چاہیے کہ حق و صداقت پر ڈٹے رہنا امت مسلمہ کا اولین مقصد ہونا چاہیے ۔ فلسطین کے لوگ عظیم مقصدکیلئے بے پناہ مشکلات برداشت کر رہےہیں۔
فلسطینی قبلہ اول بیت المقدس کی حفاظت اپنے حقوق اور آزادی کے لیے جدوجہد جاری رکھے ہوئے ہیں۔ فلسطینیوں کی طرح مقبوضہ جموں وکشمیر کے عوام بھی انتہائی جابر اور غاصب بھارت کے مظالم سہہ رہے ہیں۔
ا س موقع پر انہوں نے یہ بھی کہا کہ پاکستانی قوم کو اس وقت بڑے معاشی چیلنجز درپیش ہیں ، وزیراعظم نے کہا کہ آج کے دن ہمیں تجزیہ کرنا چاہیے کون سے عناصر خود غرضانہ مفادات کے لیے اتحاد و اتفاق کو نقصان پہنچانا چاہتے ہیں۔
اندرونی اوربیرونی خطرات کے پیش نظر ہمیں فروعی، مسلکی اورلسانی اختلافات کو بھلانا ہوگا اور ایثار و قربانی، رواداری، اتحاد اور نظم و ضبط جیسے اعلیٰ اوصاف کو فروغ دینا ہوگا۔
شہباز شریف نے کہا کہ آئیے، حضرت امام حسینؓ اور ان کے رفقاء کی عظیم قربانیوں سے سبق حاصل کریں، آزمائشوں میں بہادری اور ثابت قدمی کا مظاہرہ کریں، اللّٰہ تعالیٰ سے دعا ہے کہ وہ ہمیں حضرت امام حسینؓ کے نقش قدم پر چلنے کی توفیق عطا فرمائے۔
