By تحریک انصاف (پی ٹی آئی) اسد قیصر نے الزام عائد کیا ہے کہ ہمارے ارکان اسمبلی کو دباؤ میں لا کر وفاداریاں بدلنے کی کوشش کی جا رہی ہے، ایم این ایز کی خریداری کےلیے بڑی بڑی آفرز ہو رہی ہیں۔
ایک بیان میں انہوں نے کہا کہ تحریک تحفظ آئین پاکستان نے آئندہ جمعہ ملک گیر پُرامن احتجاج کا اعلان کیا ہے، گرینڈ ڈیموکریٹک الائنس (جی ڈی اے) سمیت دیگر سیاسی جماعتوں کو بھی احتجاج میں شرکت کی دعوت دیتے ہیں ۔
اسد قیصر نے کہا کہ ملک بھر میں امن و امان کی صورتحال بگڑتی جا رہی ہے، بانی چیئرمین، بشریٰ بی بی اور دیگر اسیران کو ناحق جیلوں میں قید کر رکھا ہے، ہمارے کارکنان اور سوشل میڈیا سے وابستہ لوگوں کو غیرقانونی اغوا کیا جا رہا ہے۔
انہوں نے کہا کہ مہنگائی کے طوفان نے عوام کو تباہ کر دیا ہے، میرا عوام کے لیے پیغام ہے آپ نے اپنے حقوق کے لیے نکلنا ہے۔
پی ٹی آئی رہنما کا کہنا تھا کہ ایک طرف آگ و خون کا کھیل کھیلا جارہا ہے، دوسری جانب سیاسی جماعتوں کا کریک ڈاؤن ہو رہا ہے، یہ ہرصورت اقتدار سے چمٹے رہنا چاہتے ہیں۔
واضح رہے کہ گزشتہ روز تحریک تحفظ آئین پاکستان نے بانی پی ٹی آئی عمران خان اور ان کی اہلیہ بشریٰ بی بی سمیت تمام اسیر قائدین و کارکنوں کو فوری رہائی کا مطالبہ کیا تھا جبکہ ایک قرارداد میں بنوں واقعے کی تحقیقات کا بھی مطالبہ کیا گیا تھا۔
