By صدر پیپلز پارٹی سندھ نثار کھوڑو نے ملک میں ٹیکنوکریٹس کی حکومت کے قیام کے متعلق فچ کی رپورٹ کو آئین اور جمہوریت کے خلاف سازش قرار دیتے ہوئے کہا ہے کے آئین میں ٹیکنوکریٹ حکومت کی کوئی گنجائش نہیں ہے۔
تفصیلات کے مطابق نثار کھوڑو نے پیپلز لیبر بیورو کے زیر اہتمام سیسی کے ھیڈ آفس میں صدر مملکت آصف علی زرداری کی 69 ویں سالگرہ تقریب سے خطاب اور میڈیا سے بات چیت کرتے ہوئے ملک میں ٹیکنوکریٹس کی حکومت کے قیام کے متعلق فچ کی رپورٹ کو آئین کے خلاف اور ملک میں آئینی ایمرجنسی کی باتوں کو جمہوریت کے خلاف سازش قرار دے دیتے ہوئے کہا ہے کے آئین پاکستان میں میں ٹیکنوکریٹ حکومت کی کوئی گنجائش نہیں ہے۔ انہوں نے کہا کے حکومت کو کہا کہ حکومت کو ہٹانے کا واحد آئینی راستہ عدم اعتماد کی تحریک ہے اور عدم اعتماد کی تحریک کی منظوری کے بنا حکومت کو نہیں گرایا جاسکتا۔ نثار کھوڑو نے کہا کے ملک میں ٹیکنوکریٹ حکومت کے قیام اور آئینی ایمرجنسی کی باتیں ملک کے جمہوری نظام کو کمزور کرنے کی کوشش ہیں۔
یہ بھی پڑھیں: جماعت اسلامی کا جڑواں شہروں میں تین مقامات پر دھرنے دینے کا فیصلہ
انہوں نے کہا کے فچ کی رپورٹ میں ملک میں ٹیکنوکریٹس کی حکومت کے قیام کی باتیں آئین کے خلاف ہیں اور آئین کے ہوتے ہوئے ٹیکنوکریٹس کی حکومت نہیں بن سکتی۔انہوں نے کہا کے 18 ویں ترمیم کے ذریعے آئین سے چھیڑ چھاڑ کرنے والوں کو آرٹیکل 6 کا مرتکب قرار دیا گیا ہے اور آئین سے چھیڑ چھاڑ کرنے والوں کے خلاف آرٹیکل 6 کی شق شامل ہونے کے بعد ملک میں ماورائے آئین اقدام اٹھانا اتنا آسان نہیں رہا۔
نثار کھوڑو نے کہا کے پیپلز پارٹی کے پی ٹی آئی سمیت تمام سیاسی جماعتوں کے لئے مفاہمت اور ڈائلاگ کے دروازے کھلے ہیں اور جب بات چیت کی بات کرتے ہیں تو عمران خان نئے انتخابات کراؤ کے مطالبے کر رہا ہے جو مطالبہ اس وقت جمہوری نہیں۔ انہوں نے کہا کے کسی سیاسی جماعت پر پابندی کےحق میں نہیں تاہم عمران خان اپنی جماعت میں موجود ٹائیگر فورس سے لاتعلقی کا اظہار کرے کیوں کے سیاست میں کسی نجی فورس کی کوئی گنجائش نہیں ہوتی ۔نثار کھوڑو نے پی ٹی آئی کو اپنے بانی کی رہائی کے لئے علامتی بھوک ہڑتال اور مظاہرے کرنے کے بجائے جیل بھرو تحریک شروع کرنے کا مشورہ دیتے ہوئے کہا کے پی ٹی آئی اگر اپنے بانی کو آزاد کرانا چاہتی ہے تو مزاحمت کرے اور جیل بھرو تحریک شروع کرے۔انہوں نے کہا کے پی ٹی آئی کا صرف مظاہرے اور ایک دو گھنٹوں کے لئے علامتی بھوک ہڑتال کرنا سیاسی جدوجہد کا مذاق اڑانے کے مترادف عمل ہے۔
یہ بھی پڑھیں: اسلام آباد پولیس نے ڈی چوک پہنچنے والے جماعت اسلامی کے کارکنان کو گرفتار کرلیا
نثار کھوڑو نے مزید کہا کے پیپلز پارٹی کو وفاق میں حکومت نہیں چاہئے۔ جمہوریت کے لئے ن لیگ کی حمایت کرکے پارلیمنٹ کو وجود میں لائے ہیں۔انہوں نے کہا کے جمہوری روایت یہ ہے کے ایوان میں ایشوزکو لایا جائے اور مخالفت کرنا یا نکتہ چینی کرنا ہراپوزیشن کا حق ہے مگر عمران خان جمہوریت کا حامی نہیں۔انہوں نے کہا کے پیپلز پارٹی جب حکومت میں ہوتی ہے تو کوئی سیاسی قیدی نہیں ہوتا تاہم اگر کوئی جرم کرے گا تو پھر قانون حرکت میں آئے گا۔ انہوں نے کہا کے عمران خان اپنے غلط کرتوتوں کی وجہ سے جیل میں ہے کیوں کے عمران خان کبھی جمھوری نہیں رہا اور وہ اپنی عادت سے مجبور ہے۔
نثار کھوڑو نے کہا کے پی ٹی آئی کے آزاد اراکین اگر محمود خان اچکزئی کی پارٹی میں جاتے تو بھی ان کو مخصوص نشستیں مل جاتی۔ انہوں نے کہا کے عدالت کا مخصوص نشستوں کے متعلق فیصلہ مبہم اور عوام کی سمجھ سے بالاتر ہے۔ مخصوص نشستوں کے متعلق عدالت میں نظرثانی درخواست دائر ہونے پر غصہ عمران خان کو ہے وہ چاہتے ہیں کے رویو پٹیشن میں تاخیر ہو۔ نثار کھوڑو نے کہا کے پہلا سویلین آصف علی زرداری ہیں جو دوسری مرتبہ صدر مملکت بنے ہیں۔ صدر آصف علی زرداری نے 18 ویں ترمیم دے کے اور پارلیمنٹ کو اپنے اختیارات حوالے کرکے ملک میں جمہوریت کے تسلسل اور پارلیمنٹ آئین کی بالادستی کو یقینی بنایا اور ان کی مفاہمتی پالیسی کی وجہ سے ملک میں جمہوری حکومتیں چل رہی ہیں۔انہوں نے کہا کے ملک میں سیاسی رسہ کشی کے خاتمے کا حل بھی صدر آصف علی زرداری کے پاس موجود ہے مگر سیاست کو انا اور ضد کی بھینٹ چڑھانےوالے آصف زرداری سےسیکھیں۔
