By عمران خان نے کہا ہے کہ مجھے جیل میں جتنی دیر رکھنا ہے رکھ لیں، میں ڈیل کرنے کو تیار نہیں، ڈیل وہ کرتا ہے جس نے کوئی جرم کیا ہو۔
تفصیلات کے مطابق بانی پاکستان تحریک انصاف عمران خان نے اڈیالہ جیل میں صحافیوں سے غیر رسمی گفتگو کرتے ہوئے کہا کہ میں صرف پاکستان کے لیے بات کرنے کو کہہ رہا ہوں، مجھے جیل میں جتنی دیر رکھنا ہے رکھ لیں، میں ڈیل کرنے کو تیار نہیں۔ ڈیل وہ کرتا ہے جس نے کوئی جرم کیا ہو۔ میرا کوئی پیسہ باہر نہیں پڑا نہ کوئی جائیداد۔ میں نے سارے کیسز لڑے ہیں، مزید بھی لڑوں گا۔مجھ پر اور میری اہلیہ پر کیسز کرنے کا مقصد پی ٹی آئی کو توڑنا تھا۔ میں کیا پاگل ہوں اپنے لوگوں کو فوج پر حملہ کرنے کا کہوں ۔میرے خلاف ایک توشہ خانہ میں چار کیسز بنائے گئے ہیں۔استغاثہ نے اپنی شہادتیں عدالت کے سامنے پیش کی اور ان کو ریکارڈ کروایا۔
عمران خان نے مزید کہا کہ میرے حق میں گواہ آئیں گے۔ گواہوں کا نام وقت سے پہلے لیا تو ان کے پیچھے ویگو ڈالا لگ جائے گا۔ میرے کیسز کا فیصلہ جلد بازی میں کیا گیا ۔مجھ سے جب 342 کا بیان لیا گیا اس کے بعد بات کرنے کاموقع ہی نہیں دیا گیا ۔سانحہ نو مئی کی تمام فوٹیجز ان ریکارڈ موجود ہیں، ریگولر میڈیا نے اس کو لائیو دکھایا۔انہوں نے مزید کہا کہ 9 مئی کے واقعات میں پی ٹی آئی کے لوگ نہیں تھے۔آگ لگانے والے ہمارے لوگ نہیں کوئی اور لوگ ہیں،جنہیں میں جانتا ہوں۔ انہوں نے صحافی کے ایک سوال پر کہا کہ پرامن احتجاج کرنا ہمارا حق ہے میں نے سب کو پرامن احتجاج کا کہا تھا میں نے کہا تھا جب مجھے پکڑیں تو آپ نے جی ایچ کیو کے سامنے پرامن احتجاج کرنا ہے۔ ظاہر ہے ہمیں جہاں سے مسئلہ ہوگا وہیں احتجاج کریں گے، یہ ہمارا آئینی حق ہے۔ ہمارے پرامن احتجاج پر ہمیں دہشت گرد بنا دیا گیا۔
مزید پڑھیں: رانا ثناءاللہ نے عمران خان پر بڑا الزام عائد کر دیا
ان کا مزید کہنا تھا کہ میں بھی چاہتا ہوںملک میں امن ہو ،ملک میں استحکام ہو ،نو مئی پر ایک ہی راستہ ہے ۔ہمیں انصاف دیا جائے۔میرے پاس بہت وقت ہے ،وقت ان کے لیے ختم ہو رہا ہے۔ان بے وقوفوں کو سمجھ نہیں آرہی اس حکومت کے پاس دو ماہ سے زائد کا وقت نہیں ہے ۔دو ماہ میں اس حکومت کا دھڑن تختہ ہونے والا ہے ۔ملک میں بنگلہ دیش سے برے حالات ہیں۔اسی لیے کہہ رہا ہوں ان کے نام ای سی ایل پر ڈالے جائیں۔
بانی پی ٹی آئی نے ایک اور سوال کے جواب میں کہا کہ ان ریلوں کٹوں کا ایک ہی مقصد ہے ،فوج کے ذریعے پی ٹی آئی کو ختم کیا جائے اور یہ بچ جائے لیکن یہ نہیں بچیں گے ۔میرے خلاف یہ سب اس لیے کیا جا رہا ہے کہ میں کوئی ڈیل کروں لیکن میں کوئی ڈیل نہیں کروں گا۔ میرے خلاف جتنے مقدمات بنانے ہیں بنا لیں جتنا جیل میں رکھنا ہے رکھ لیں، ملک میں اگر عبوری سیٹ اپ قائم کیا جائے اور اس کے تحت الیکشن کروائے جائے کیا ۔چیف الیکشن کمشنر سب سے بڑا فراڈیہ ہے ۔اس نے پہلے بھی فراڈ الیکشن کروائے ۔ضمنی الیکشن میں بھی انہوں نے پہلے ہی ڈبے بھر دیے ،کسی کو دیکھنے تک نہیں دیا مرضی کے رزلٹ جاری کیے۔ موجودہ حکومت کے زیر انتظام بننے والے عبوری سیٹ اپ اور اس چیف الیکشن کمشنر کی نگرانی میں کوئی بھی انتخابات ہوئے ۔ہم الیکشن کو تسلیم نہیں کریں گے۔
