By پراونشل ڈیزاسٹر مینجمنٹ اتھارٹی نے دریائے سندھ میں سیلابی صورتحال کےپیشِ نظر جنوبی پنجاب کے اضلاع میانوالی، مظفر گڑھ، ڈیرہ گازی خان، لیہ اور راجن پور میں ریسکیو و ریلیف سرگرمیاں شرو ع کر دی ہیں۔
ترجمان پی ڈی ایم اے کے مطابق دریائے سندھ میں سیلابی صورتحال کے پیشِ نظر میانوالی، لیہ، مظفر گڑھ، ڈیرہ غازی خان اور راجن پور کے 34 موضع جات زیر آب آئے ہیں اور ان متاثرہ علاقوں میں ریسکیو سرگرمیوں میں 24 کشتیاں اور 78 ریسکیو ورکرز مصروف عمل ہیں، سیلابی علاقوں میں مجموعی طور پر 36 ریلیف کیپمس قائم کیے گئے ہیں۔ ڈی جی پی ڈی ایم اے کے مطابق 930 افراد کو بروقت محفوظ مقامات پر منتقل کیا گیا ہے اور متاثرہ علاقوں میں 33 میڈیکل کیمپس میں تقریباً 1572 افراد کو علاج و معالجہ کی سہولیات فراہم کی گئی۔
یہ بھی پڑھیں: موسلاھار بارشوں نے تباہی مچا دی، پی ڈی ایم اے نے جانی و مالی نقصان کی ابتدائی رپورٹ جاری کر دی
ڈائریکٹر جنرل پی ڈی ایم اے عرفان کاٹھیا کے مطابق زیر آب علاقوں سے 757 مویشیوں کو محفوظ مقامات پر منتقل جبکہ 42714 جانوروں کی ویکسینیشن کی گئی ہے، انہوں نے کہا کہ پی ڈی ایم اے و انتظامیہ کے بروقت ریسپانس سے کوئی جانی و مالی نقصان نہیں ہوا ہے اور سیلاب کے پانی سے مجموعی طور پر 785 گھر اور 49 ہزار 212 ایکڑ رقبہ متاثر ہوا۔ عرفان کاٹھیا کے مطابق دریائے سندھ میں آئندہ چند روز تک سیلابی صورتحال برقرار رہنے کا خدشہ ہے ۔وزیر اعلیٰ پنجاب کی ہدایات کے پیشِ نظر تمام متعلقہ ادارے الرٹ رہیں۔ انہوں نے عوام الناس سے التماس کی ہے کہ ہنگامی صورتحال میں انتظامیہ سے تعاون کریں اور کہا کہ شہریوں کے انخلاء اور بحالی تک ریسکیو و ریلیف سرگرمیاں جاری رہیں گی اور ایمرجنسی کی صورت میں پی ڈی ایم اے کی ہیلپ لائن 1129 پر رابطہ کریں ۔
