By ضلع خیبر کی وادی تیراہ میں سکیورٹی فورسز کے آپریشن کے دوران 4 خارجی دہشتگرد ہلاک جبکہ 3 جوان شہید ہوگئے۔
آئی ایس پی آر کے مطابق خیبر کی وادی تیراہ میں تین مختلف مقامات پر سیکیورٹی فورسز اور دہشت گردوں کے درمیان فائرنگ کا شدید تبادلہ ہوا۔ آپریشن کے دوران سیکیورٹی فورسز نے 4 دہشت گردوں کو ہلاک کردیا جبکہ فائرنگ کے تبادلے میں 3 نوجوان سیکیورٹی اہلکار شہید ہوگئے۔
شہید ہونیوالوں میں حوالدار انعام گل، سپاہی محمد عمران اور سپاہی الطاف خان شامل ہیں، 37 سالہ حوالدار انعام گل شہید کا تعلق ضلع میانوالی سے ہے، 39 سالہ سپاہی محمد عمران شہید کا تعلق ضلع ٹانک جبکہ 22 سالہ سپاہی محمد الطاف خان شہید کا تعلق ضلع مردان سے ہے۔
آئی ایس پی آر کا کہنا ہے کہ فورسز دہشت گردی کے خاتمے کے لیے پرعزم ہیں، ہمارے بہادر جوانوں کی قربانیاں ہمارے عزم کو مضبوط کرتی ہیں، یہ آپریشن خطے سے دہشت گردی کے خاتمے کے لیے سیکیورٹی فورسز کے عزم کا ثبوت ہے۔
