مون سون بارشیں، پی ڈی ایم اے نے اربن فلڈنگ کا الرٹ جاری کر دیا

پروونشل ڈیزاسٹر منیجمنٹ اتھارٹی پنجاب نے 18اگست تک صوبے بھر میں مون سون بارشوں کی پیشنگوئی کر دی۔

ترجمان پی ڈی ایم اے نے کہا ہے کہ گزشتہ 24گھنٹوں میں جہلم میں 30 ملی میٹر، منگلامیں 25 جبکہ سیالکوٹ اور گجرانوالہ میں 19 ملی میٹر بارش ریکارڈ کی گئی۔ جبکہ آئندہ 24 گھنٹوں میں پنجاب کے بیشتر اضلاع میں آندھی اور گرج چمک کے ساتھ بارش کے امکانات ہیں۔

پی ڈی ایم اے کے مطابق لاہور ، گجرانوالہ، راولپنڈی ، سرگودھا، ملتان ، ڈیرہ غازی خان ، بہاولپور، فیصل آباد ، ساہیوال اور گجرات ڈویژنز میں مون سون بارشیں متوقع ہیں۔

ڈی جی پی ڈی ایم اے نے بتایا کہ موسمی صورتحال کے بارے میں صوبے بھر کی انتظامیہ کو الرٹ جاری کر دیا گیا ہے۔ وزیراعلیٰ پنجاب کی ہدایت کے پیش نظر محکمےالرٹ رہیں اور اربن فلڈنگ کے خدشے کے پیش نظر پیشگی انتظامات مکمل کریں۔

پی ڈی ایم اے نے کمشنرز ، ڈی سیز، واسا، محکمہ آبپاشی ، ریسکیو، سول ڈیفنس اور دیگر متعلقہ محکموں کو الرٹ رہنے کی ہدایت بھی کر دی ہے۔