By پاکستان تحریک انصاف (پی ٹی آئی ) نے اندرونی اختلافات کے خاتمے کے لئے کمیٹی تشکیل د ے دی ہے۔
تفصیلات کے سابق صدر مملکت ڈاکٹر محمدعارف علوی کو کمیٹی کا سربراہ مقرر کر دیا گیا ہے ۔ اس حوالے سے نجی ٹی وی چینل’’ جیو نیوز ‘‘کے مطابق ذرائع کاکہنا ہے کہ عارف علوی ایک ہفتے کے دوران پاکستان تحریک انصاف( پی ٹی آئی )میں اندرونی اختلاقات کے خاتمے کے لیے کمیٹی کو اپنی تجاویز دیں گے۔
عارف علوی پارٹی میں خاص طور پر اختلافات رکھنے والے رہنماؤں سے ملاقات اور ان کے تحفظات بھی سنیں گے۔ یاد رہے کہ گزشتہ دنوں تحریک انصاف خیبر پختونخوا میں سابق صوبائی وزیر شکیل احمد خان کو وزارت سے ہٹانے کے معاملے پر پارٹی میں شدید اختلافات کھل کرسامنے آئے تھے۔
؎پی ٹی آئی خیبر پختونخوا کے پارلیمانی واٹس ایپ گروپ پر بھی وزیراعلیٰ علی امین گنڈا پور اور شکیل خان کے درمیان تلخ کلامی ہوئی تھی اور دونوں نے ایک دوسرے پر کرپشن کے الزامات بھی عائد کئے تھے۔ اس کے علاوہ پاکستان تحریک انصاف پنجاب میں بھی اختلافات کی خبریں سامنے آئی تھیں۔
پارٹی چیئرمین عمران خان کی جانب سے بھی تحریک انصاف میں اختلافات کی خبروں کا نوٹس لیا گیا تھا اور تمام پارٹی رہنماؤں کو اپنے اختلافات ختم کرنے کی ہدایت کی تھی۔
یہ بھی پڑھیں:عمران خان کی صحت سے متعلق ان کے ذاتی معالج کا بیان سامنے آگیا
تاہم مشیر اطلاعات خیبر پختونخوا بیرسٹر سیف پارٹی میں اختلافات کی خبروں کی سختی سے تردید کرتے رہے ہیں اور ان کا کہنا ہے کہ پارٹی عمران خان کی قیادت میں متحد و منظم ہے، حکومتی وزراء کی پی ٹی آئی رہنماؤں میں پھوٹ ڈالنے کی سازشیں کامیاب نہیں ہونے دیں گے۔
