By بانی پی ٹی آئی نے کمرہ عدالت میں صحافیوں سے غیر رسمی گفتگوکرتے ہوئے کہا کہ گینز بُک میں دو نئی انٹریاں ہونے والی ہیں۔
عمران خان نے کہا کہ ایک انٹری اس یوٹرن کی ہوگی جس میں ووٹ کو عزت دو کا کہہ کر بوٹ کو عزت دی گئی۔ نواز شریف اڑھائی سال تک ووٹ کو عزت دو کا کہتے رہے۔ خواجہ آصف نےجتنا برا بھلا کہا کسی نے نہیں کہا۔ انہوں نے کہا احسن اقبال نے پہلی مرتبہ حمود الرحمان کمیشن رپورٹ کا بتایا۔ احسن اقبال یہ بھی کہتے رہے پاکستان میانمار بننے جارہا ہے۔ جب بھی مذاکرات کی بات ہوتی ہے یہ 9 مئی کا شور مچاتے ہیں۔ یہ 9 مئی پر معافی کا مطالبہ کرتے ہیں، نو مئی انکی انشورنس پالیسی ہے۔ 9 مئی ختم ہوا تو انکی حکومت اور سیاست دونوں ختم ہوجائینگی۔ جمہوریت کی باتیں کرنے والے بوٹ کو عزت دینے لگ گئے ہیں۔نو مئی کی تحقیقات کرنی ہے تو اسکے لئے جوڈیشل کمیشن بنایا جائے۔ مجھے اغواء کرنے کا جس نے حکم دیا اور جس نے سی سی ٹی وی فوٹیج غائب کی نو مئی کی سازش اسی نے کی۔
عمران خان نے مزید کہا کہ گینز بک میں دوسری انٹری اس پر ہوگی کہ نواز شریف چاروں امپائروں کو ملا کر کھیلا پھر بھی ہارگیا۔دوسری پارٹی کو میچ کھیلنے ہی نہیں دیا گیا۔پیٹن کی رپورٹ ہے کہ یاسمین راشد سے جتانے کیلئے نواز شریف کو 74 ہزار ووٹ ڈلوائے گئے۔بات چل رہی ہے مزاکرات کی محمود خان اچکزئی کی۔حکومت سےبات چیت کیلئے ہمیشہ تیار ہیں۔بات انکے ساتھ ہوگی جو با اختیار ہیں جو انکو لیکر آئے ہیں،جنکے فیصلے کی قابلیت ہے۔ان سے بات کرنا الیکشن میں انکے ڈاکے کو تسلیم کرنا ہے۔
ان کا کہنا تھا کہ ہمارے 8 ستمبر کے جلسے کے تین مقاصد ہیں۔ایک مقصد چوری کیا ہوا مینڈیٹ پی ٹی آئی کو واپس کیا جائے۔دوسرا مقصد قبضہ گروپ سے ملک کو حقیقی آزادی دلانی ہے۔تیسرا مقصد ملک میں آزاد عدلیہ ہے۔ قاضی فائز عیسیٰ کو لانے کیلئے عدلیہ پر حملہ کیا جارہا ہے۔
انہوں نے کہا کہ آکسفورڈ یونیورسٹی کا چانسلر بننا پاکستان کیلئے اعزاز ہوگا۔اگر چانسلر نہ بن سکا تو بھی کوئی بات نہیں۔ پاکستان میں کرکٹ کی تاریخ میں اس مقام تک کوئی نہیں پہنچا جہاں میں پہنچا ہوں۔ پاکستان میں سب سے بڑا philanthropist میں ہوں۔ہم نے دو ہسپتال بنائے، دو یونیورسٹیاں بنائی ایک یونیورسٹی بن رہی ہے۔
