By سینئر قیادت کی گرفتاری کے بعد پاکستان تحریک انصاف (پی ٹی آئی) نے جمعہ سے ملک گیر احتجاج شروع کرنے کا فیصلہ کیا ہے۔
ذرائع کے مطابق پشاور میں پی ٹی آئی کور کمیٹی کا اجلاس ہوا جس میں وزیراعلیٰ خیبرپختونخوا علی امین گنڈاپور اور دیگر مرکزی رہنماؤں نے شرکت کی جہاں احتجاج کا فیصلہ کیا گیا۔ جمعے سے ملک بھر میں احتجاج کا آغاز ہوگا اور پی ٹی آئی کے رہنما اسمبلی فلور پر گرفتاریوں کی مذمت بھی کریں گے۔
دریں اثناء پی ٹی آئی کے رہنما سلمان اکرم راجہ نے پریس کانفرنس کے دوران کہا کہ ملک کے سیاسی اور جمہوری عمل پر کچھ عناصر کا غلبہ ہے۔ انہوں نے الزام عائد کیا کہ پی ٹی آئی کے جلسے کو روکنے کے لیے ایک روز قبل ایک قانون پاس کیا گیا اور جلسے کا ماحول اتنی آسانی سے تبدیل نہیں کیا جاسکتا۔ انہوں نے یہ بھی کہا کہ عوام پر حملہ ناقابل قبول ہے۔
واضح رہے کہ اسلام آباد پولیس نے گزشتہ روز چیئرمین پی ٹی آئی بیرسٹر گوہر اور دیگر رہنماؤں کو گرفتار کیا تھا تاہم چیئرمین پی ٹی آئی کو رہا کردیا گیا تھا جب کہ انسداد دہشت گردی کی عدالت نے پولیس کی جسمانی ریمانڈ کی درخواست منظور کرلی تھی۔ ملزمان میں شیر افضل مروت، زین قریشی، جمشید دستی، پی ٹی آئی کے چیف وہپ عامر ڈوگر، نسیم شاہ اور احمد چٹھہ شامل ہیں۔
