By پاکستان تحریک انصاف (پی ٹی آئی) آج لاہور میں ایک شاندار سیاسی پاور شو کرنے جا رہی ہے، جس کے لیے مختلف شہروں سے قافلوں کی آمد کا سلسلہ جاری ہے۔پی ٹی آئی کی قیادت نے اس موقع کو کامیاب بنانے کے لیے تمام تیاریاں مکمل کر لی ہیں۔
تفصیلات کے مطابق چیئرمین تحریک انصاف کی قیادت میں کارواں روات سے لاہور کی جانب بڑھ رہا ہے۔ چیئرمین پی ٹی آئی بیرسٹر گوہر، عامر مغل اور شعیب شاہین نے پی ٹی آئی کے کارکنوں کے ساتھ مل کر موٹروے کے راستے بند ہونے کی وجہ سے جی ٹی روڈ کا انتخاب کیا ہے۔ پی ٹی آئی رہنماوں نے ہدایت دی ہے کہ کارکن جی ٹی روڈ سے لاہور آئیں تاکہ کسی قسم کی مشکلات کا سامنا نہ کرنا پڑے۔
یہ بھی پڑھیں: پی ٹی آئی جلسہ : لاہور پولیس نے جلسہ گاہ جا نے والے راستے بند کردیئے
عامر مغل نے اس موقع پر میڈیا سے بات چیت کرتے ہوئے کہا کہ “ہمارا پیغام یہ ہے کہ قوم بانی تحریک انصاف عمران خان کے ساتھ کھڑی ہے۔ ہم اس جلسے کے ذریعے یہ واضح کرنا چاہتے ہیں کہ عوام کا ساتھ ہمارے ساتھ ہے۔”
کارواں میں شامل کارکنوں کی تعداد میں اضافہ ہو رہا ہے، اور پی ٹی آئی کی قیادت نے اس جلسے کو کامیاب بنانے کے لیے بھرپور تیاری کی ہے۔ ان کا عزم ہے کہ وہ اس موقع پر عوامی حمایت کا مظاہرہ کریں گے اور اپنے پیغام کو مزید مؤثر انداز میں پہنچائیں گے۔
یہ جلسہ ملک کی سیاسی صورتحال کے پیش نظر خاص اہمیت کا حامل ہے، جہاں پی ٹی آئی نے عوامی حمایت کو مزید مستحکم کرنے کے لیے متوقع بڑی تعداد میں شرکت کا عزم کیا ہے۔
یہ بھی پڑھیں: بیرسٹر گوہر کی چھٹی؟ عمران خان کو نئے پارٹی چیئرمین کی تلاش
دوسری جانب پی ٹی آئی کے لاہور جلسے کی تیاری زور و شور سے جاری ہے۔ جلسہ شروع ہونے سے قبل پنڈال کو سجانے کے لیے ہزاروں کی تعداد میں کرسیاں پہنچا دی گئی ہیں۔
پی ٹی آئی کارکنان نے الزام عائد کیا ہے کہ پولیس نے ان کی لائٹیں، جنریٹرز، اور اسپیکر پکڑنا شروع کر دیے ہیں، جبکہ کارکنان کو جلسہ گاہ پہنچنے سے بھی روکا جا رہا ہے۔
کارکنان کا کہنا ہے کہ یہ اقدامات ان کی حوصلہ شکنی کے لیے کیے جا رہے ہیں، اور وہ اس صورتحال کے خلاف آواز اٹھائیں گے۔ انہوں نے مطالبہ کیا ہے کہ پولیس کو اپنی کارروائیاں روک کر انہیں جلسہ میں شرکت کرنے دیا جائے تاکہ وہ اپنے قائد کے پیغام کو عام عوام تک پہنچا سکیں۔
یہ صورتحال جلسے کی کامیابی کو متاثر کرنے کی کوششوں کا حصہ سمجھی جا رہی ہے، جس سے پی ٹی آئی کی قیادت اور کارکنان میں بے چینی پائی جاتی ہے۔
جلسہ گاہ کی تازہ ترین صورتحال:
آج پی ٹی آئی جلسے کے اوقات کیا ہیں؟
شہری انتظامیہ نے پی ٹی آئی کو لاہور میں آج سہ پہر 3 سے 6 بجے تک رنگ روڈ کے علاقے کاہنہ میں جلسہ کرنے کی اجازت دے دی۔
دوسری جانب لاہور پولیس نے کاہنہ جلسہ گاہ کے سکیورٹی انتظامات مکمل کر لیے ہیں۔ شہر کے داخلی و خارجی راستوں پر سکیورٹی الرٹ ہے اور چیکنگ جاری ہے۔
ڈی آئی جی آپریشنز نے کہا کہ امن و امان کا قیام اور شہریوں کا تحفظ لاہور پولیس کی اولین ترجیح ہے۔ انہوں نے یقین دلایا کہ لاء اینڈ آرڈر کی صورتحال کو ہر صورت برقرار رکھا جائے گا۔
شرکاء کی سکیورٹی کے لیے 12 ہزار سے زائد افسران و اہلکار ڈیوٹی پر مامور ہیں۔ اس میں 15 ایس پیز، 63 ڈی ایس پیز، 165 ایس ایچ اوز/انسپکٹرز اور 1002 اَپر سب آرڈینیٹس شامل ہیں۔ خواتین شرکاء کی چیکنگ کے لیے 324 لیڈیز اہلکار بھی ڈیوٹی پر ہیں۔
ڈی آئی جی آپریشنز نے مزید بتایا کہ ڈولفن سکواڈ کی ٹیمیں بھی جلسہ گاہ کے ملحقہ شہروں میں موثر گشت یقینی بنا رہی ہیں۔ سٹی کیمروں کی مدد سے جلسہ گاہ اور اطراف کی مانیٹرنگ بھی کی جا رہی ہے۔ موٹر سائیکل اور گاڑیوں کی پارکنگ کے لیے مخصوص ایریا بھی مختص کیا گیا ہے۔
