By لاہور : دہشت گردی کے خدشات کے پیش نظر سی ٹی ڈی نے پنجاب کے مختلف شہروں میں 65 انٹیلی جنس بیسڈ آپریشنز کیے ہیں۔ ان کارروائیوں کے دوران 5 دہشت گرد گرفتار کیے گئے ہیں۔
یہ کارروائیاں لاہور، میانوالی، بہاولپور، جھنگ اور ٹوبہ ٹیک سنگھ میں کی گئیں۔ لاہور اور میانوالی سے فتنہ الخوارج کے دو انتہائی خطرناک دہشت گرد اسلحہ اور بارودی مواد سمیت گرفتار ہوئے۔
دہشت گردوں کے قبضے سے دھماکہ خیز مواد، 4 ہینڈ گرنیڈ، 3 ڈیٹونیٹر، 18 فٹ حفاظتی فیوز وائر، گولیاں، اسلحہ، موبائل فون اور نقدی بھی برآمد کی گئی۔ گرفتار دہشت گردوں کی شناخت امجد، شیر، زباب، طیب اور باز خان کے نام سے ہوئی ہے۔
حکام کے مطابق یہ دہشت گرد مختلف مقامات پر کارروائی کر کے عوام میں خوف و ہراس پھیلانا چاہتے تھے۔ رواں ہفتے کے دوران 980 کومبنگ آپریشنز کیے گئے جن میں 109 مشتبہ افراد کو گرفتار کیا گیا۔
کومبنگ آپریشنز میں 32,662 افراد سے پوچھ گچھ کی گئی ہے۔ سی ٹی ڈی نے “محفوظ پنجاب” کے ہدف پر عمل پیرا ہونے کا عزم کیا ہے اور دہشت گردی کے ناسور کو جڑ سے اکھاڑ پھینکنے کے لیے پرعزم ہے۔
