عالمی مارکیٹ میں خام تیل سستا، پاکستان میں بھی پیٹرول قیمتوں میں کمی کا امکان

ملک میں مسلسل پانچویں مرتبہ پیٹرولیم مصنوعات کی قیمتوں میں کمی کا امکان ہے

تفصیلات کے مطابق یکم اکتوبر سے پیٹرول اور ہائی اسپیڈ ڈیزل کی قیمتوں میں کمی متوقع ہے۔ 30 ستمبر کی شب پیٹرول، ڈیزل اور کیروسین آئل کی قیمتوں میں نمایاں کمی ہونے کی تصدیق کی گئی ہے۔ ملک میں ڈیڑھ ماہ کے دوران پیٹرول کی قیمت میں 26.5 روپے اور ڈیزل کی قیمت میں 34 روپے فی لیٹر کی کمی ہوئی ہے۔اس کے ساتھ ہی مہنگائی کی شرح میں بھی نمایاں کمی آئی ہے اور شرح سود میں 2 فیصد کی کمی کی گئی ہے۔

مزید پڑھیں: خام تیل کی قیمتیں مزید بڑھ گئیں

دوسری جانب عالمی مارکیٹ میں خام تیل کی قیمتوں میں مسلسل کمی کا رجحان جاری ہے۔ منگل کو کمزور عالمی طلب کے خدشات کی بنا پر خام تیل کی قیمتوں میں مزید کمی واقع ہوئی ہے۔ نومبر کے لیے برینٹ کروڈ آئل کی قیمت 48 سینٹ کمی کے ساتھ 72.27 ڈالر ہوگئی ہے، جبکہ امریکی کروڈ آئل کی قیمت میں بھی 37 سینٹ کی کمی ہوئی ہے۔عالمی مارکیٹ میں تیل کی قیمتوں میں حالیہ کمی کا سبب چین میں ایندھن کی طلب میں معمولی کمی اور برآمدی مارجن میں کمی ہے اور یہ رجحان آئندہ چند روز تک جاری رہنے کا امکان ہے۔