سست انٹرنیٹ سے پریشان صارفین کیلئے خوشخبری

اسلام آباد: پاکستان ٹیلی کمیونیکیشن اتھارٹی (پی ٹی اے) نے سٹارلنک کو ہائی سپیڈ سیٹلائیٹ انٹرنیٹ فراہم کرنے کے لیے لائسنس جاری کرنے کا اصولی فیصلہ کر لیا ہے۔ یہ اقدام ملک میں انٹرنیٹ کی سہولیات کو بہتر بنانے کے لیے ایک اہم قدم ہے۔

تفصیلات کے مطابق پی ٹی اے کے حکام کے مطابق سٹارلنک کا لائسنس تیار ہے، تاہم اس کی سیکیورٹی کلیئرنس ابھی باقی ہے۔ جیسے ہی سیکیورٹی کلیئرنس مل جائے گی، سٹارلنک کو لائسنس جاری کر دیا جائے گا۔ اس کے علاوہ سٹارلنک کو پاکستان میں سروس فراہم کرنے کے لیے سپارکو کے ساتھ ایک کمرشل معاہدہ کرنا ہوگا، جو کہ پی ٹی اے میں جمع کرانا بھی ضروری ہے۔ پی ٹی اے حکام نے اس بات کی تصدیق کی ہے کہ سٹارلنک کی سروس پاکستان میں ایک سال سے کم عرصہ کے اندر شروع ہونے کی توقع ہے۔

یہ بھی پڑھیں: سوزوکی موٹرسائیکل خریدنے کے خواہشمندوں کیلئے شاندار آفر متعارف کروا دی گئی

یہ اقدام ملک بھر کے شہریوں کو ہائی سپیڈ انٹرنیٹ کی سہولیات فراہم کرے گا، جس سے دور دراز علاقوں میں بھی انٹرنیٹ کی رسائی ممکن ہوگی۔ یہ پیش رفت پاکستانی صارفین کے لیے خوشخبری ہے، جو کہ انٹرنیٹ کی سست رفتاری اور عدم دستیابی سے پریشان ہیں۔ سٹارلنک کی خدمات سے امید کی جا رہی ہے کہ وہ ان مشکلات کو دور کرنے میں اہم کردار ادا کریں گی۔