پاکستان تحریک انصاف کے بانی عمران خان اور وزیرِ اعلیٰ خیبر پختونخوا علی امین گنڈا پور کے خلاف ایک اور مقدمہ درج کر لیا گیا ہے۔
تفصیلات کے مطابق اسلام آباد میں علی امین گنڈا پور اور عمران خان کے خلاف چونگی نمبر 26 کے مقام پر ہنگامہ آرائی کرنے پر تھانہ نون میں مقدمہ درج کیا گیا ہے، جس میں دہشت گردی سمیت 10 مختلف دفعات شامل کی گئی ہیں۔ مقدمے کے مطابق مظاہرین پر سرکاری گاڑیوں پر حملہ کر کے انہیں آگ لگانے کا الزام عائد کیا گیا ہے، اور اس میں عامر مغل سمیت 3 ہزار سے زائد نامعلوم کارکنان کو بھی شامل کیا گیا ہے۔
مقدمے کے متن میں یہ بھی کہا گیا ہے کہ عمران خان جیل میں ہونے کے باوجود غیر ضروری ملاقاتیں کرتے ہیں اور ان ملاقاتوں کے دوران کارکنوں کو ریاست کے خلاف اُکساتے ہیں۔ واضح رہے کہ گزشتہ کچھ دنوں میں عمران خان اور دیگر پی ٹی آئی رہنماؤں کے خلاف 20 سے زائد مقدمات درج کیے جا چکے ہیں، جن میں سے بیشتر میں دہشت گردی کی دفعات شامل کی گئی ہیں۔
By 
