حکومت نے مجوزہ آئینی ترمیم کا ڈرافٹ پی ٹی آئی کیساتھ شیئر کر دیا، عامر ڈوگر

پاکستان تحریک انصاف کے رہنما عامر ڈوگر نے تصدیق کی ہے کہ حکومت نے مجوزہ آئینی ترامیم کا ڈرافٹ پی ٹی آئی کے حوالے کر دیا ہے۔

تفصیلات کے مطابق عامر ڈوگر نے بتایا کہ حکومت کل عجلت میں قومی اسمبلی کا اجلاس بلانے کی کوشش کر رہی تھی، تاہم کمیٹی نے اس معاملے کو ایس سی او سمٹ تک موخر کرنے کا فیصلہ کیا ہے۔ اس کے بعد قومی اسمبلی کا اجلاس ایس سی او سمٹ کے بعد منعقد ہوگا۔

عامر ڈوگر نے مزید کہا کہ حکومت کی جانب سے دیا گیا ڈرافٹ بہت سے ابہامات سے بھرپور ہے۔ انہوں نے یہ بھی کہا کہ حکومت اب تک کمیٹی کے سامنے وہ تمام تفصیلات پیش کرنے میں ناکام رہی ہے، جو وہ حقیقتاً کرنا چاہتی ہے۔ اس مسئلے پر اتفاق رائے پیدا کرنے کے لیے خصوصی کمیٹی کی کچھ مزید نشستیں منعقد کی جائیں گی۔

پی ٹی آئی کے رہنما نے وضاحت کی کہ انہیں آج ہی حکومت اور پیپلز پارٹی کے ڈرافٹس موصول ہوئے ہیں۔ انہوں نے کہا کہ آئینی ترامیم ایک اہم معاملہ ہیں، جس کے لیے مزید وقت درکار ہوگا۔ وہ ان ڈرافٹس پر اپنی سیاسی کمیٹی اور اہم رہنماؤں کے ساتھ مشاورت کریں گے۔

عامر ڈوگر نے بتایا کہ پیپلز پارٹی کے ڈرافٹ میں مکمل وضاحت موجود ہے، جبکہ حکومت کے ڈرافٹ میں کئی ابہامات پائے جاتے ہیں۔ حکومتی ڈرافٹ میں وکلاء کی رائے کے ساتھ ساتھ کچھ دیگر نکات بھی شامل کیے گئے ہیں۔

قبل ازیں مولانا فضل الرحمان نے حکومت کی جانب سے پہلی بار آئینی ترامیم کا ڈرافٹ شئیر کرنے پر اپنی رائے کا اظہار کیا ہے۔ انہوں نے کہا کہ اب دیکھتے ہیں کہ یہ بات کہاں تک پہنچتی ہے۔

انہوں نے مزید کہا کہ پیپلز پارٹی کی تجاویز بھی سامنے آئی ہیں، جس سے مذاکرات کا عمل مزید آگے بڑھنے کی توقع ہے۔ مولانا فضل الرحمان نے بتایا کہ جمیعت علمائے اسلام (جےیو آئی) اور پیپلز پارٹی اس ڈرافٹ پر مشاورت کریں گی تاکہ آئینی ترامیم کے حوالے سے مشترکہ موقف اپنایا جا سکے۔

انہوں نے یہ بھی واضح کیا کہ پیپلز پارٹی حکومت کے ساتھ اور جےیو آئی پاکستان تحریک انصاف (پی ٹی آئی) کے ساتھ بھی مشاورت کرے گی، تاکہ تمام اسٹیک ہولڈرز کے نقطہ نظر کو مدنظر رکھا جا سکے۔