سونے کی عالمی اور مقامی مارکیٹوں میں پیر کو قیمتوں میں مزید اضافہ دیکھا گیا۔ بلین مارکیٹ میں سونے کی قیمت 3 ڈالر کے اضافے کے بعد 2659 ڈالر فی اونس تک پہنچ گئی۔
بین الاقوامی مارکیٹ میں سونے کی قیمتوں میں اضافے کی وجہ سے مقامی سطح پر بھی فی تولہ سونا 200 روپے کے اضافے سے 2 لاکھ 75 ہزار 700 روپے ہو گیا۔ اسی طرح دس گرام سونے کی قیمت 171 روپے کے اضافے کے ساتھ 2 لاکھ 36 ہزار 368 روپے پر جا پہنچی۔ یاد رہے کہ ہفتے کو سونے کی فی تولہ قیمت میں 1600 روپے کا اضافہ ہوا تھا، جس کے بعد یہ 2 لاکھ 75 ہزار 500 روپے پر پہنچ گئی تھی۔
دریں اثنا چاندی کی فی تولہ قیمت 3 ہزار 500 روپے پر مستحکم رہی۔ واضح رہے کہ گزشتہ ماہ سونے کی فی تولہ قیمت 2 لاکھ 77 ہزار روپے کی بلند ترین سطح پر پہنچی تھی۔
دوسری جانب انٹر بینک مارکیٹ میں پیر کو امریکی ڈالر کے مقابلے میں پاکستانی روپے کی قدر میں 0.01 فیصد کی کمی ریکارڈ کی گئی۔ ڈالر 277.66 روپے پر بند ہوا، جو کہ ڈالر کے مقابلے میں 0.02 روپے کی کمی ہے۔ گزشتہ ہفتے ڈالر کے مقابلے میں روپے کی قدر میں 12 پیسے یا 0.04 فیصد کی کمی ہوئی تھی، جس کے بعد یہ 277.64 روپے پر بند ہوا۔
By 
