کراچی: صرافہ مارکیٹ میں سونے کی قیمتوں میں نمایاں اضافہ دیکھنے کو ملا ہے۔
صرافہ ایسوسی ایشن کے مطابق سونے کی فی تولہ قیمت میں 1100 روپے کا اضافہ ہوا ہے، جس کے بعد سونے کی نئی قیمت 2 لاکھ 83 ہزار 400 روپے فی تولہ ہو گئی ہے۔ جبکہ دس گرام سونے کی قیمت میں بھی 943 روپے کا اضافہ ہوا ہے، اور یہ اب 2 لاکھ 42 ہزار 970 روپے پر پہنچ گئی ہے۔
عالمی مارکیٹ میں سونا 11 ڈالر کے اضافے سے 2737 ڈالر فی اونس تک پہنچ چکا ہے، جس کا اثر مقامی مارکیٹ پر بھی پڑا ہے۔ دوسری جانب چاندی کی فی تولہ قیمت 3 ہزار 150 روپے پر مستحکم رہی۔
ڈالر کے حوالے سے کاروباری ہفتے کے دوسرے انٹربینک سیشن میں معمولی اضافے کا رجحان رہا۔ اسٹیٹ بینک آف پاکستان کے اعداد و شمار کے مطابق انٹربینک میں ڈالر کی قیمت 5 پیسے کے اضافے کے ساتھ 277 روپے 74 پیسے ہو گئی ہے۔ کاروبار کے آغاز میں ڈالر 277 روپے 65 پیسے پر ٹریڈ کر رہا تھا، تاہم کل کے اختتام پر یہ 277 روپے 69 پیسے پر بند ہوا۔
اوپن مارکیٹ میں ڈالر کی قیمت میں 3 پیسے کی کمی دیکھنے کو ملی، اور یہ 278 روپے 72 پیسے پر آ گیا۔ اسی طرح، دیگر بڑی کرنسیوں میں یورو کی قیمت میں 1 روپے 30 پیسے کی کمی ہوئی اور یہ 300 روپے 75 پیسے پر آ گیا، جبکہ برطانوی پاؤنڈ 1.25 روپے سستا ہو کر 361.50 روپے پر ٹریڈ کر رہا ہے۔
خلیجی کرنسیوں میں یو اے ای درہم کی قیمت میں 3 پیسے کا اضافہ ہوا اور یہ 75.89 روپے تک پہنچ گیا، جبکہ سعودی ریال کی قیمت 74.09 روپے پر مستحکم رہی۔
پاکستان اسٹاک مارکیٹ میں بھی مثبت رجحان رہا، جہاں ہنڈرڈ انڈیکس نئی بلند ترین سطح پر پہنچ گیا۔ 100 انڈیکس میں 409 پوائنٹس کا اضافہ ہوا، جس کے بعد یہ 86 ہزار 466 کی نئی بلند ترین سطح پر بند ہوا۔ آج کے کاروبار میں 72 کروڑ شیئرز کی خرید و فروخت ہوئی، جن کی مالیت 25 ارب روپے کے قریب رہی۔
By 
