ایم جی موٹرز پاکستان نے پاکستانی صارفین کیلئے الیکٹرک گاڑیوں کی قیمتوں میں بڑا ڈسکائونٹ متعارف کروا دیا۔
تفصیلات کے مطابق گاڑیوں کی معروف کمپنی ایم جی موٹرز پاکستان نے اپنی الیکٹرک گاڑیوں پر 24لاکھ 99 ہزار روپے تک بڑی ڈسکاؤنٹ آفر کا اعلان کردیا۔ جس سے الیکٹرک گاڑیوں کے شوقین افراد اور ممکنہ خریداروں کو بہترین موقع فراہم کیا جا رہا ہے۔
چینی آٹو کمپنی ایم جی موٹرز نے ایک سال قبل پاکستان میں اپنی جدید الیکٹرک گاڑی ایم جی 4 لانچ کی تھی، جو اپنی جدید خصوصیات اور بہترین پرفارمنس کی بدولت مارکیٹ میں خاصی توجہ حاصل کرنے میں کامیاب رہی ہے۔
ایم جی 4 ایک کمپیکٹ الیکٹرک گاڑی ہے جو کہ نہ صرف ماحولیاتی لحاظ سے فائدہ مند ہے بلکہ اپنی کشادہ انٹیریئر اور جدید ڈیزائن کی وجہ سے بھی صارفین کی پسندیدہ بن گئی ہے۔
اس کی مکمل چارج پر بہترین رینج نے بھی صارفین کو متاثر کیا ہے، حالانکہ اس کی قیمت دیگر روایتی گاڑیوں کے مقابلے میں زیادہ ہے اور دیکھ بھال کے اخراجات بھی زیادہ ہیں۔
ایم جی موٹرز پاکستان نے الیکٹرک گاڑیوں کی فروخت کو بڑھانے کے لیے نئی پروموشن کا آغاز کیا ہے۔ اس پروموشن کے تحت الیکٹرک کار کے شوقین افراد اور ممکنہ خریداروں کے لیے خاص پیشکشیں فراہم کی جا رہی ہیں، جس سے نہ صرف ان کی خریداری کے مواقع بڑھیں گے بلکہ مارکیٹ میں ایم جی 4 کی طلب میں بھی اضافہ متوقع ہے۔
ایم جی موٹرز نے اپنی مختلف الیکٹرک گاڑیوں پر نمایاں رعایتیں متعارف کرائی ہیں جو خریداروں کے لیے ایک شاندار موقع فراہم کرتی ہیں۔ اس پیشکش کے تحت ایم جی 4 ایکسائٹ (MG4 Excite) کی قیمت 10,999,000 روپے سے کم ہوکر 9,900,000 روپے ہو گئی ہے، جس سے خریدار کو 1,099,000 روپے کی بچت ہوگی۔
اسی طرح ایم جی 4 ایسنس (MG4 Essence) کی قیمت 12,990,000 روپے سے کم کرکے 11,000,000 روپے کر دی گئی ہے، جس سے 1,990,000 روپے کی بچت ممکن ہے۔ ایم جی زیڈ ایس ای وی اسٹینڈرڈ (MG ZS EV Standard) پر بھی 1,990,000 روپے کی رعایت دی گئی ہے، جس کی نئی قیمت 11,000,000 روپے ہے۔
مزید برآں لانگ رینج ماڈل (MG ZS EV Long Range) کی قیمت 14,999,000 روپے سے کم ہوکر 12,500,000 روپے ہو گئی ہے، جس سے خریداروں کو 2,499,000 روپے کی نمایاں بچت ہوگی۔
یہ خصوصی پیشکش 15 نومبر 2024 تک دستیاب رہے گی لیکن گاڑیوں کی محدود دستیابی کی وجہ سے یہ پیشکش جلد ختم ہو سکتی ہے۔
By 
