سندھ حکومت کا گاڑیوں کی رجسٹریشن اور ٹرانسفر کیلئے آن لائن سہولت دینے کا فیصلہ

سندھ حکومت نے گاڑیوں کی رجسٹریشن اور ٹرانسفر کی سہولت گھر بیٹھے فراہم کرنے کا فیصلہ کیا ہے۔

تفصیلات کے مطابق سینئر وزیر شرجیل میمن نے اعلان کیا کہ یکم جنوری سے یہ تمام عمل آن لائن کر دیا جائے گا۔ محکمہ ایکسائز و ٹیکسیشن کے اعلیٰ سطحی اجلاس میں شرجیل میمن نے کہا کہ آن لائن سسٹم سے عوام کو سہولت ملے گی اور کیش ڈیلنگ ختم ہونے سے شفافیت میں اضافہ ہوگا۔

انہوں نے یہ بھی ہدایت دی کہ اب نجی گاڑیوں پر سرکاری نمبر پلیٹس نہیں چلیں گی، اور اس سلسلے میں کریک ڈاؤن کے احکامات جاری کیے جا چکے ہیں۔سینئر وزیر نے ٹیکس ہدف بڑھانے اور وصولیوں کو تیز کرنے کی ہدایت دیتے ہوئے کہا کہ محکمہ ایکسائز نے حالیہ مالی سال کے ٹیکس ہدف کا 34 فیصد وصول کر لیا ہے، جو کہ ایک مثبت پیشرفت ہے۔ سرکاری نمبر پلیٹس والی گاڑیوں کی چیکنگ کی جائے گی، اور نجی گاڑیوں پر سرکاری نمبر پلیٹس لگانے والوں کے خلاف کارروائی کی جائے گی۔

شرجیل میمن نے مزید کہا کہ گاڑیوں کی رجسٹریشن، ٹیکس ادائیگی، اور نمبر پلیٹس کی چیکنگ کے لیے مزید اقدامات کیے جائیں گے۔ نقد ڈیلنگ کے خاتمے سے عوام کو بہتر سہولت ملے گی اور شفافیت کو بھی فروغ ملے گا۔ حکومت سندھ کے ویژن کے تحت ٹیکس ادائیگی کا نظام مزید آسان ہوگا، جس کا مقصد عوام کی مشکلات کا خاتمہ کرنا ہے۔

پریمئم اور پرسنل نمبر پلیٹس کی آن لائن نیلامی کو تیز کرنے کے لیے مہم چلائی جائے گی تاکہ زیادہ سے زیادہ لوگ اس سے فائدہ اٹھا سکیں۔ آن لائن نیلامی سے جمع ہونے والی رقم سیلاب متاثرین کی رہائش کی تعمیر کے لیے استعمال کی جائے گی۔