بشریٰ بی بی اور عمران خان کی بہنوں کی رہائی سے متعلق وزیراعلی سندھ بھی بول پڑے

کراچی: وزیر اعلیٰ سندھ مراد علی شاہ نے بشریٰ بی بی اور بانی پی ٹی آئی کی بہنوں کی رہائی کو ڈیل کا نتیجہ قرار دینے کی تردید کر دی۔

ایک تقریب کے دوران مراد علی شاہ سے پوچھا گیا کہ کیا یہ رہائی ڈیل کے تحت ہوئی ہے؟ جس پر انہوں نے واضح کیا کہ ضمانت عدالتوں نے دی ہے، اور اس میں ڈیل کا کوئی عمل دخل نہیں۔

مراد علی شاہ نے مزید کہا کہ انہیں ڈیل یا ڈھیل کے معاملات کا علم نہیں۔ کسی کی رہائی عدالت کا معاملہ ہے اور قانون کی خلاف ورزی کرنے والوں کو سبق سیکھنا چاہیے۔

ایک اور سوال کے جواب میں انہوں نے کہا کہ پُرامن احتجاج سب کا حق ہے لیکن اس کے لیے اجازت درکار ہوتی ہے۔ ہمیں معاشرے کی بہتری کے لیے اجتماعی طور پر کام کرنا چاہیے۔ انہوں نے بتایا کہ رواداری مارچ کے دوران تشدد کی رپورٹ انہیں موصول ہو چکی ہے اور قانون ہاتھ میں لینے والوں کو سزا ملے گی۔

تقریب میں گفتگو کرتے ہوئے مراد علی شاہ نے کہا کہ عوام کی فلاح و بہبود کے لیے اقدامات کیے جا رہے ہیں، پیسوں کی کمی نہیں، مسئلہ اہل اور پرعزم ہیومن ریسورس کا ہے۔ مزید برآں، بچوں کی تعلیم و تربیت پر خصوصی توجہ دی جا رہی ہے، اور اس مقصد کے لیے اساتذہ کو تربیت فراہم کی جائے گی تاکہ بچوں کو بہتر تعلیم دے سکیں۔