ایم جی موٹرز کی جانب سے گاڑیوں پر بڑی ڈسکاؤنٹ آفر

ایم جی موٹرز پاکستان نے اپنی مشہور الیکٹرک گاڑیوں، ایم جی 4 اور ایم جی زیڈ ایس، پر 24 لاکھ 99 ہزار روپے تک کی رعایت کا اعلان کیا ہے۔

یہ آفر الیکٹرک گاڑیوں کے شوقین افراد اور ممکنہ خریداروں کے لیے ایک بہترین موقع فراہم کر رہی ہے۔ کمپنی نے ایک سال قبل ایم جی 4 کو پاکستان میں متعارف کرایا تھا، جس نے اپنی جدید خصوصیات اور بہترین کارکردگی کی بدولت مارکیٹ میں خاص توجہ حاصل کی۔

اگرچہ ایم جی 4 کی قیمت دیگر گاڑیوں کے مقابلے میں زیادہ ہے اور اس کی دیکھ بھال بھی مہنگی ہے، مگر اس کی کشادہ انٹیریئر اور مکمل چارج پر بہترین رینج نے صارفین کی تعریفیں حاصل کی ہیں۔

ایم جی موٹرز نے اپنی الیکٹرک گاڑیوں کی فروخت بڑھانے کے لیے ایک نئی پروموشن متعارف کروائی ہے۔ اس کے تحت، ایم جی 4 ایکسائٹ کی قیمت 10,999,000 روپے سے کم ہو کر 9,900,000 روپے ہوگئی ہے۔ اسی طرح، ایم جی 4 ایسنس کی قیمت 12,990,000 روپے سے کم کر کے 11,000,000 روپے کردی گئی ہے، جس سے خریدار 1,990,000 روپے کی بچت کر سکتے ہیں۔

ایم جی زیڈ ایس ای وی اسٹینڈرڈ پر بھی 1,990,000 روپے کی رعایت دی گئی ہے، جس کی قیمت اب 11,000,000 روپے ہے، جبکہ لانگ رینج ماڈل کی قیمت 14,999,000 روپے سے کم ہو کر 12,500,000 روپے ہوگئی ہے، جس سے خریدار 2,499,000 روپے کی بچت کر سکتے ہیں۔

یہ خصوصی پیشکش 15 نومبر 2024 تک دستیاب ہے، اور گاڑیوں کی محدود دستیابی کے باعث جلد ختم ہو سکتی ہے۔ الیکٹرک گاڑیوں میں دلچسپی رکھنے والے صارفین کو مشورہ دیا گیا ہے کہ وہ ان بہترین رعایتوں سے فائدہ اٹھائیں۔