پاکستان کے معروف موسیقار اور طبلہ نواز الطاف حسین طافو انتقال کرگئے۔
استاد طافو خان کو طبلہ نوازی پر کمال مہارت حاصل تھی، 1970 میں اپنے کیریئر کا آغاز پنجابی فلم انورا سے کیا اور پہلی ہی جست میں شائقین کے دل موہ لیے۔
استاد طافو خان نے پنجابی کے ساتھ بے شمار اردو فلموں کی دھنیں بھی ترتیب دیں، مشہور پنجابی گانا ’سن وے بلوری اکھ والیا‘ فلم بینوں کے ذہنوں پر نقش ہو گیا۔
استاد طافو نے ملکہ ترنم نورجہاں اور نصرت فتح علی خان سمیت عظیم گلوکاروں کے ساتھ کام کیا۔
یہ بھی پڑھیں : پی سی بی کا محمد رضوان کو ون ڈے اور ٹی 20 کا کپتان مقرر کرنے کا فیصلہ
استاد طافو عام طور پر شوق اور چنچل دھنیں بنانے میں مشہور تھے، 1999 میں فلم دیساں دا راجا کیلئے خوبصورت دھنیں بنائیں تو شہرت چہار دانگ عالم پھیل گئی۔
استاد طافو کو خدمات کے اعتراف میں 2023 میں صدارتی تمغہ حسن کارکردگی سے نوازا گیا۔ وزیراعلیٰ پنجاب مریم نواز نے استاد طافو خان کے انتقال پر اظہارتعزیت کیا۔
استاد طافو خان گردوں کے عارضے میں مبتلا تھے، ان کی نماز جنازہ 27 اکتوبر کو بعد نماز ظہر کریم بلاک علامہ اقبال ٹاؤن میں ادا کی جائے گی۔