لاہور نے آلودگی میں دنیا کو پیچھے چھوڑ دیا، پرائمری اسکول ایک ہفتے کے لیے بند

حکومت پنجاب نے لاہور میں اسموگ کی خراب صورتحال کے باعث پرائمری اسکولوں کو ایک ہفتے کے لیے بند کرنے کا فیصلہ کیا ہے۔

سینئر وزیر پنجاب مریم اورنگزیب نے لاہور میں ایک پریس کانفرنس کے دوران بتایا کہ بھارت سے آنے والی ہوا کی وجہ سے لاہور میں اسموگ کی صورتحال میں اضافہ ہوا۔ بھارت میں فصلوں کی باقیات جلانے اور دھویں کے باعث فضائی آلودگی میں اضافہ ہوا، اور ہوا میں اسموگ تیز ہوگئی، جس سے لاہور سب سے زیادہ متاثر ہوا۔

یہ بھی پڑھیں: عمران خان جیل سے رہائی کے بعد پاکستان میں ہی رہیں گے،بیرسٹر سیف

انہوں نے مزید کہا کہ اسموگ کے تدارک کے لیے حکومت پنجاب نے متعدد اقدامات کیے ہیں، جن میں 550 سے زائد بھٹوں کو مسمار کرنا، پلاسٹک بیگ پر پابندی لگانا، اور مختلف علاقوں میں ایئر کوالٹی انڈیکس (اے کیو آئی) کی صورتحال کی نگرانی شامل ہے۔لاہور کا ایئر کوالٹی انڈیکس ایک ہزار سے تجاوز کر گیا، اور کل مختلف مقامات پر اے کیو آئی 1900 تک پہنچ گیا تھا، جو بعد میں کم ہوگیا۔

مریم اورنگزیب نے عوام سے اپیل کی کہ وہ اسموگ کی صورتحال کے پیش نظر احتیاطی تدابیر اختیار کریں، اور بتایا کہ اب تک ایک ہزار سپر سیڈز کسانوں میں تقسیم کیے جا چکے ہیں، اور ای بائیکس منصوبہ شروع کیا گیا ہے۔انہوں نے اس بات پر زور دیا کہ اسموگ کا مسئلہ بھارت سے بات چیت کے بغیر حل نہیں ہوسکتا، اور کہا کہ اسموگ کورونا کی طرح ہے جو سرحدوں سے آرہی ہے۔

یہ بھی پڑھیں: ہنڈا سی جی 125 کی نومبر کیلئے قیمت سامنے آگئی

پنجاب حکومت کی جانب سے جاری کردہ نئے الرٹ کے مطابق لاہور میں اسموگ کی تازہ ترین صورتحال کی معلومات گرین ایپ پر دستیاب ہیں۔