ایف آئی اے کی بڑی کارروائی، لیبیا کشتی حادثے میں ملوث اہم ملزم گرفتار

وفاقی وزیر داخلہ محسن رضا نقوی کی ہدایات پر انسانی سمگلنگ میں ملوث نیٹ ورکس کے خلاف گھیرا تنگ کردیا گیا ،  وفاقی تحقیقاتی ادارے (ایف آئی اے) نے لیبیا کشتی حادثے کا اہم ملزم گرفتار کرلیا۔

ترجمان کے مطابق ایف آئی اے نے حافظ آباد میں کارروائی کرتے ہوئے کشتی حادثے میں ملوث ریڈ بک کا انتہائی مطلوب اشتہاری ملزم بشیر احمد کو گرفتار کرلیا ہے،  اشتہاری ملزم بشیر احمد کے خلاف 10 سے زائد مقدمات درج تھے ، ملزم کے خلاف  کمپوزٹ سرکل گجرات نے سال 2022 میں مقدمات درج کئے، ملزم کا نام ریڈ بک کے انتہائی مطلوب افراد کی فہرست میں شامل ہے۔

یہ بھی پڑھیں : فیڈریشن آف چیمبر خسارے میں ڈوبی قومی ایئرلائن خریدنے کیلئے تیار

ترجمان ایف آئی اے کابتانا ہے کہ  گرفتار ملزم نے متاثرین کو یورپ بھجوانے کے نام کروڑوں روپے ہتھیائے ، ملزم نے 12 متاثرین سے فی کس 18 لاکھ روپے وصول کئے ، ملزم نے گینگ کے دیگر ملزمان کی مدد سے متاثرین کو غیر قانونی طور پر نائیجریا اور لیبیا میں محصور بھی رکھا۔

ترجمان کا کہنا تھا کہ ملزم نے متاثرین کو کشتی کے ذریعے لیبیا سے اٹلی بھجوانے کی کوشش کی ، کشتی حادثے میں متاثرہ شہریوں کی موت واقع ہوئی ، ملزم کو جدید ٹیکنالوجی کو بروئے کار لاتے ہوئے حافظ آباد سے گرفتار کیا گیا ۔

ترجمان نے مزید کہا کہ ملزم سے تفتیش کا آغاز کر دیا گیا ہے  جبکہ دیگر ملزمان کی گرفتاری کے لئے چھاپے مارے جا رہے ہیں۔