پنجاب کے کئی اضلاع میں اسموگ کے باعث تعلیمی ادارے بند، آن لائن کلاسز کا آغاز

پنجاب کے مختلف اضلاع میں اسموگ کے بڑھتے ہوئے اثرات کے پیش نظر تعلیمی ادارے بند کر دیے گئے۔

ڈی جی ماحولیات پنجاب نے اس حوالے سے نوٹیفیکیشن جاری کیا ہے کہ نجی و سرکاری تعلیمی ادارے بارہویں جماعت (ایف اے، اے لیول) تک بند رہیں گے۔

نوٹیفیکیشن میں کہا گیا ہے کہ تمام تعلیمی ادارے آن لائن کلاسز پر منتقل ہوں گے تاکہ طلباء کی تعلیم جاری رہے اور اسموگ کے مضر اثرات سے بچا جا سکے۔

مزید پڑھیں: نومبر میں موسم خشک اور بارشیں معمول سے کم ہونے کی پیشنگوئی

نوٹیفکیشن کے مطابق لاہور، شیخوپورہ، قصور، ننکانہ صاحب سمیت گوجرانوالہ، گجرات، حافظ آباد، منڈی بہاؤالدین، سیالکوٹ، نارووال کے تعلیمی اداروںکو بند رکھنے کا فیصلہ کیا گیا ہے۔

مزید برآں فیصل آباد، چنیوٹ، جھنگ، ٹوبہ ٹیک سنگھ، ملتان، لودھراں، وہاڑی اور خانیوال میں بھی اسکولز بند رہیں گے۔

نوٹیفیکیشن کے مطابق اسکولز بند رہنے کا فیصلہ 7 سے 17 نومبر تک مؤثر رہے گا۔ اس دوران تعلیمی ادارے اپنی تدریس کا عمل آن لائن جاری رکھیں گے تاکہ طلباء کی تعلیم متاثر نہ ہو۔